Barajê Ilisû ke viraştişê ci dewam keno de rijnayîşê Heskîfo ke 12 hezar serrî kehen o, domîyeno. Qeza de hetêk ra rijnayîş dewam keno, heto bîn de bin nameyê ‘restorasyon’î de beton dîyeno Qela Heskîfî ro. Bi desan şikeftê ke vejîyenî qela, bi betonî reyde ameyî pirrkerdene.
Nînan ra şikefta ke tarîxê ci heta 10 hezar serrî şono, bi kepçeyan ameye rijnayene û herinda ci de beton ame rokerdene. Heta nika xeylê tirbe, mînare, hemam û sewbîna cayê xo ra ameyî wedarnayene û kirişîyayî sewbîna cayan. Heta nika bi seyan şikeftî bin nameyê restorasyonî de ameyî rijnayene.
Kesê ke verê cu turîstan rê rayberî kerdêne, nika zî wexto ke turîstî yenî qeza, qeza danî şinasnayene. Rayberan ra Şehmus Turgayî va ‘ma rijnîyayîşê qeza ver zaf xemgîn î’ û wina domna: “Na şikefte tarîxê aye heta 10 hezar serrî kehen o, labelê seba barajo ke emrê ci 50 serrî yo yena rijnayene. Ma êdî nêzanî ke se bikerî. Ma ca û waranê xo ra yenî vetene. Ez şenikîya xo ra nata na şikefte bi meymanan dana şinasnayene. Heta ke emrê mi bibo, ez do Heskîf bida şinasnayene.”
MA / ÊLIH