AZÎZ KOYLUOGLU / ANHA/QAMIŞLO
Rûsya, Îran û Tirkîya ke demêko derg o ke Sûrîye ser o plananê lêminan kenî, pêvînayîşê Astana de Hêzê Sûrîyeya Demokratîke (HSD) girewtî rojeva xo. Rûsya prosesêko winasî de îdîa kerd ke çeteyê DAIŞî xo amade kenî ke bi sîlehanê kîmyewîyan hêrişê HSDyî bikerî û da zanayene ke çeteyan teberê Sûrîye ra 11 pisporî ardî û sîlehê kîmyewîyî dayî viraştene.
Rûsya îzehetê xo de derheqê dewe, mekteb, hûmara pisporan û sewbîna de xeylê malûmatî zî dayî. Rûsya hem malûmatan dana û hem zî vera çeteyan de çîyêk nêkena. No zî merdim dano fikirîyayene.
Şerê 7 serran yê Sûrîye de bi desan reyan sîlehê kîmyewî ameyî bikarardene. Sûrîye de çend reyî hetê rejîmî ra sîlehê kîmyewî vera çeteyan de ameyî bikarardene. Reyna Taxa Şêxmeqsûdî de çeteyan vera YPGyî de şuxilna. Reyna Rûsyaye verê cû îdîa kerdbî ke çeteyî do hêrişê hêzanê rejîmî bikerî, labelê Peymana Soçî ra dima na îdîa rojeve ra kewtbî.
Peymana Soçî ra 2 aşmî dima grûbanê çeteyan vera Helebî de sîlehê kîmyewî şuxilnaybî. Pisporê herême dîyar kenî ke îdîayê Rûsya raşt î, la vatî ‘nê hêrişî goreyê menfîetanê tayê hêzan yenî viraştene’.
Nika nîno zanayene ke Astana de çi ame qiseykerdene. Labelê prosesêko winasî de Rûsya dîyar kerd ke çeteyî amadekarîya hêrişê kîmyewî kenî. O wext tayê persî yenî vîrê merdimî. Nê persan ra yo tewr muhîm; gelo sîlehê kîmyewî do bi destê çeteyan vera HSDyî de bêrî bikarardene? Reyna eke destê çeteyan de sîlehê kîmyewî estbî, o wext çira heta nika çeteyan nînan bikar nêard? Çira Rûsya vera çeteyan de çîyêk nêkena?
Merdim eşkeno persan zêde bikero. Labelê ganî bêro zanayene ke eke Dêra Zor de sîlehê kîmyewî bêrî bikarardene, o wext pey nê çeteyan de xeylê dewletê dinya û hêzê herêmî estî û destek danî çeteyan.