Hêrişê plankerde yî
Wêneyê mîtîngî de aseno ke teqîyayîşî ra ver, dekewtişê mîtîngî de ti tedbîrê asayîşî nêameyo girewtiş û no zî teqyayîşê Amed û Pirsûsî de zî wina bi. Rayna çend deqîqeyê verîya teqyayîşî de hêzê asayîşî heme raşte veng kerdî. No zî nawneno ke dewlet teqyayîşî ra agahdar a. Teqyayîşî ra dima her çend ke bi seyan welatij merdbî û bi seyan zî dirbêtin bîbî zî, herinda ke nêy merde û dirbêtinan ra hetkarî bêro dayîş, polîs û çeteyê AKPe bi bombeyê gazî, awa şidênaye û fîşekê raştikên hêrişê şarê mexdurî kerd.
Do hesab bidî şarî
Hêrişî ra dima wezîrê AKPe vecyay hemverê rojnamegeran îzehetî day, labelê Wezîrê Karê Zereyî Selamî Altinok herinda ke xo sey verpersîyar biveyno û îstîfa bikero vat ke ti kêmanîya asayîşî çina. Serekwezîr zî wexto ke îzehet day hezey ke verpersîyarê teqyayîşî HDP bibo, HDPe dekerd hedefê xo û sucdar kerd. Tewr peynî zî RTUK zî weşînayîşê qirkerdişî qedexe kerd. Eyro zî no qirkerdiş sero Amed, Stenbol, Enqere, Îzmîr, Wan û xeylê şaristanê Kurdistan û Tirkîyaye de bi awayo wişk ame lanetkerdiş û şar vat ke do hesabê ci bêro persayîş. Sereyê de KCK û xeylê rayvistişê sîvîlî û welatê dinyaye hemverê hedîseye bertekê xo mojnay. n NAVENDA XEBERAN
Ma hemverê qirkerdişî do bêveng nêmanî
Hemsereka Navendê Komelî ya Demokratîkî Yildiz Fîlîmcî qalîkerdişê xo de keyeyê êy ke qirkerdişî de cuyeyê xo dayî rê serweşî waşt û qalîkerdişê xo wina domna: “Ma no tabloye verê zî dîbi. Ma mîtîngê Amedî de bi desan embazê xo vînî kerd. Rayna Pirsûsî de zî embazê ma amey qetilkerdiş. Dejê ma zaf gird o, labelê ma rayna do aştîye de îsrar bikerî.”
Ma do israr bikerî
Federasyonê Yewitîya Elewîyan a Ewropaye ra Huseyîn Mat zî derheqê qirkerdişî de ard ziwan ke êy kesê ke no qirkerdişî viraştî û paştî dayî înan şermizar kenî û wina vat: “Erdnîgarîya ke ma sero cuyenî de do yew roj aştî serwer bibo. No semedî ra ma eyro Kolnî de qirkerdişê Enqereye de virazya do protesto û lanet bikerî. Ma no dejî bar kenî, labelê tena bar nêkenî, ma rikê ke mîyanê ma de kom bîyo zî ma do nîşan bidî.”
Hêrîşê dewlet û AKPe yo
Temsîlkara Yewitîya Cenîyan ê Sosyalîstî Ayşe Yumlî Yeter zî dîyar kerd ke ma zaf hêrsbîyaye yî û qalîkerdişê xo wina peynî kerd: “Enqereye de bombeyî amey teqnayîş. No hêriş, hêrişê dewlet û AKPe ya. Vizêr çeteyê AKPe vatênê ma do gonî birijnî. Ma zaf baş zanî ke verpersîyarê no qirkerdişî kam î. No semedî ra ma eyro Ewropaye de nînan lanet kenî. Ma do hemverê nînan do bêveng nêmanî. Bombeyê ke Amed, Pirsûs û tewr peynî zî Enqereye de amey teqnayîş, do şîyîşê AKPe hîna rewêr bikero, çimkî şarê ma vîr nêkeno û hemverê nînan de şarê ma qet bêveng nêmaneno.”
ANF/KOLN