Vizêr ceniyanê Kurd startê nûmayişanê 8ê Adar Sîlopya de da. Nûmayiş de 3 ceniyê Kurd Sêvê demîr, Pakîze Nayir û Fatma Ûyar yad bî. Nûmayiş de hayr anciya xoverdayişê ceniyanê kurd ser.
Bi seyan ceniyê ke ver bana HDP de are bî sloganê “Bicuw xoverdayişê Cizîr”, “Bicuw Serok Apo” berz kerdî. Hemseroka HDP yê Sîlopya Aycan Azma qiseyê akerdinî kerd û mesaja domnayişê xoverdayişê ceniyan da.
Raya înan raya ma ya
Ser nameyê 3 ceniyanê kurd ke amey qetilkerden maya Sêvê Demîr Sakîne Demîr qisey kerd. Demîr da zonayen ke, ray û tekoşîna 3 ceniyan, ray û tekoşîna înan a. Dayik Demîr aşkere kerd ke bi kiştişî nêşay înan biqedînê û wina va: “Her ca yê dinya de nameyê înan yeno ziwan. Ê hinî ebi fikrê xo veng danê ceniyanê dinya. Ê tekoşîna ceniyan de bî jû meşale. Ebi adirê Kobanê ra bî jû. Zey ke DAIŞ’î tarûmar kerdî, dê pêrokîn zaliman tarûmar bikerê. Sakîne Demîr qiseyê xo bi “Bicuw şar û ceniyê kurd” qedîna.
Ceniyê xoverder verniya ma roşnî kenê
Qiseykerdoxa HDK Gulîstan Kiliç Koçyîgît zî ceniyan selamî kerd û va, Sîlopî de hewcedariyê qisey çinyo, şima 37 rojan de bi xoverdayişê xo qiseyê hewce vatî. Koçyîgît aşkere kerd ke ceniyê xoverder, Sêvê, Fatma û Pakîzeyan taritiyan roşnî kenê û qiseyê xo wina ramit: “Wazenê îradeyê ceniyan zî teslîm bigîrê. Barbarîzmê şima ra çîçegî abenê. Botan bin nêkewno. Ceniyê Botan xoverdayişê ma kenê gird, omid danê xoverdayişê ma. No omid do ma biresno serkewtiş. Dawaya ma dawaya pêrokîn şaran a û heqdar a. Ma dê na tekoşîn de serkewê.
Gulîstan Kiliç Koçyîgît aşkere kerd ke, bi qetilkerdişê şarê kurd çarekerdiş nêbeno û hayr ant qetlîamê Cizîr ser: “Bodrimanê Cizîr de însanan bi wehşiyane qetil kerdî. Sûr de wazenê qeçekan, ceniyan qetil bikerê.
Badê qiseyanê Koçyîgît Nûmayiş de mesaja pîyê Fatma Ûyar Reşît Ûyar’î amê wendin.
Destana qehremanî yê ceniyan
Tewr peynî de hemseroka HDP Fîgen Yuksekdag qisey kerd û vist vîrî ke veriya çend mengan Sîlopya de ceniyan û şarî destana qehremanî nusna. Yuksekdag va, “eke persbikerê vajê destana qehremaney yê ceniyan Sîlopya de yena nusnayen. Sêvê, Pakîze û Fatma ra piya ceniyê Sîlopyayij na sûk de destanê xorayverîn û azadî nusnay”.
Sîlopyayijî bi serberzî ser payan ê
Fîgen Yuksekdag ard ziwan ke serva hereketê ceniyan yê dinya xoverdayişê ceniyanê Sîlopyayê noqteya mihîm yê destpakerdiş o. Yuksekdag va, ma ewro bi meşaleya ke destê ceniyê ke amey qetilkerdiş roşnî benê û wina dewam kerd: “Bi seyan qorî ma qetilkerdî la her reynî vinî kerdî. Na sûka ke janê girdî dî de nika fina jîldana. Cenî rind zanê ke her keye û kuçe de bibê qîrayişê azadî.
Ameyiş yê ma yo
Hemseroka HDP Fîgen Yuksekdag da zonayen ke, ewro Sîlopya de tenya ban û sîyan rijnay, la şarê Sîlopya bi serberzî ser pay de ro. Omid û îrade bi serberzî ser pay de ro. Yuksekdag va, nay rind bizanê, şima nêşenê no şarî û ceniyan çinî bikerê. Ma dê na sûka ke rijiya pêro piya hewadê ser pay.
Fîgen Yuksekdag ard ziwan ke, cenî senî ke wayrê kamî û îradeyê xo vejyay, dê wayrê sûka xo zî bivejyê û wina va: “Şima nêşkenê serkewê. Nê ceniyan dêsê keyeyê xo kerdî barîqat. Kamcî quwet şeno nê ceniyan çinî bikero. Her cayê na hardî cayê ma yê azadî û cuwyayişî yê. Barîqatê ma, xoverdayişê ma yo. Heta ke no şar bi azadî bicuwyo ma dê tekoşîna xo bidomnê. Ameyiş yê ma şarê ma û ceniyan o. Yuksekdag va, tarixê Tirkiye de zilmê winayin nêvîniya. La vera no zilmî xoverdayişê winayîn zî nêame diyayiş. Hemseroka HDP peynî de da zonayen, yê ke xoverdanê, ceniyê ke xoverdanê dê serkewê.
DÎHA/ŞIRNEX