Kurdan înkar û îmha kena ma naye qebûl nêkenê. No erdnîgarî ser tenê tirkî nêcuyen netewê bînî zî estê û cuyen ê. Kurd zî netewê, lazim o mafê yine bêro dayiş, mawo semed bi dest fînim şer bikerime. Pêro dinya bîy şahid no şer kerd. Key waşt agirbest zî kerd (New rey). Newrozê serra 2013 badê diyaloxan bi Birêz OCALANî dir; “Ewro ra pey sedemêko ma şer bikerime nêmendo, înkar û îmha nêmendo. Lazim o wa eyro ra pey muzakere bêro kerdiş makezagon newe ra bêro nûştiş. Heme netew, ol û mezheb tey dir biresê mafanê xo”.
Bi na hişmendîya gerîlla go şêro teberê tixûbî. Ku makezagon bêro nuştiş mafê siyasetî bêro dayiş, siyaseto legal ma wo bê çekan karê xo bikerime. Bi na hişmendî diyaloxî heta mutabaqatê Saraya Dolmabaxçe weş vêrte. Des xalan ser mutabaqat virazya. Heyeta Îmrali û verpersê dewlet tey dir qarşî temamê dinya û Tirkiya rê ame aşkerakerdiş. Sebe serekkomarî vat; ez mutabaqat qebûl nêkena. Masa qelibnena. Meseleya kurdan çinya. Ez pêroyin (Dekena bûzdolabî) cemednena. Pancê menga nîsane ra heta ewro tecrîd na ro Îmrali ser. Ti kes nêşi vînayiş. Nê heyet, nê malbat û nê zî pawtioxî. Wexto dîyalox û muzakere çinêy bo rayhevalê OCALANî û şarê kurd, yê SEREK hesibnenê ka go sekerê.
Rocêk çenek go mangê xo bidoşo. Goke giredana. Satilê xo gena şitê manga doşena satil. Şeytan şino şimûdêka gok pê giredaya keno sist. Gok xo feletnena, şimûdra a bena. Şina şitê manga boro. Satil miyane çîmikanê ceneked, serê goke guneno satilê şitîro şit rijyeno. Kêrîyê meşka doy verê ceneked, çenek bena kêrîro dana gokero gok kuna war. Manga awnena goka xo ra, a zî qocê xo dana kişta ceneke ro, cenek miyanê gonîd a zî kuna war. Hevalê cenek vînen manga qocê xo da ceneke ro, o zî kardî geno dano manga ro, manga kuna war. Babê çenek vînen kardî destê zamê cê de keynê cêy miyanê gonîd birîndar. O zî van senin bo zamê min do keynê min ro. Demançe tedir beno, o zî bi demançe guli nano zamê xo wa, zama kuno war. Şeytan nê pêroyinan paweno, vîneno. Ewna vano; “Nika go vacê nê pêro sebeb tiyê. Ka min se kerd tenê min şimûdê gok kerd sist”.
Yê ma zî sera mekazagona 1924 de amewa nûştiş tede pêro netew, ol û mezhebi înkar amey kerdiş. A sere ra heta ewro tekoşîn yeno dayiş. Sera 1980 de derbe ame kerdiş. Mekazagona K. Evrenî hemey caya xo da. Hema zî yeno vatiş ka ma sekerd. Şima mekazagon newe ra nênûşt, şima çahr hezarî dew cay û warî vêşnay. Şima pancas henzarî merdim qetil kerd. Bi hezaran merdim şima dekerd girtigehan. Şima nê hewt mengê peyinan de Vakurê Kurdistanî de jiyan nêverda. Teberkewtiş banan ra teber qedexe kerd. Şaristanan û qezayan de aw û ceyran cu bi xo wo. Şima aw û ceyran birna. Her roj qezayan de merdimi yenê qetilkerdiş.
Nesîp GULTEKÎN