Heta wexta ame vatişî ke heramîyê DAIŞî kewtê Kobane, serekkomarê Tirkiyaye xo ra nêgirot û kêfan ra vat; “Kobane ha kewte ha go biko” la hem serekkomar hem zî heme kes, serek û dewletê ke çimê înan ro kewtişê Kobane yo lazim o ke fam bikerê ke ena saete ra tepya Kobane ser kewta. Beno ke wendoxî vacê senîn ser kewta.
Erê, bi ser kewta. Heta bi çend awayî bi ser kewta. Yew tera xoverdayîşo ke Kobane nizdê aşmêke yo di binê banê YPG/YPJ’e de tenê bi keleşanê destê xo hemverê tanq û topanê çeteyan de dana yo. Xoverdayîşêke ke tarîxa şoreşa ti şarêke de nêameyo dîtîşî. Enî awayî xobawerîyêke pîle mîyanverê şarê kurdî de viraşt û bi ay awayî girêdayîşê bi jobînan û yewîtî di mîyanverê înan de viraşt.
Bi nê awayî gamêka pîle û muhîme şoreşê înan de amî eştişî ke berdêlê şoreşêke bi desan serran o. Wayîr ro Kobane vetiş û serhildanê her çar perçeyan ê mîyanê enî hefteyî ay awayî baş ano çiman ver. Ê diyîne hemverê DAIŞî ‘Ke bîyo kapose dinya’ xoverdayîşê înan o. Eno awa zî bi sebeb ke heyranî û naskerdişê kurdan mîyanê dewletanê dinya de virazyo.
Amerîka bixo ke zana aye û Tirkiya cinawirêke senîn şirawito kurdan ser xoverdayîşê şerrwananê kurdan ê di Kobane de şaş manena. Bi nê qaydî şerrwanê kurdan ê cênî zî bala şexsîyet û şaran ancenê.
Aynan ra yew Mûdireya Karê Nûşetyan a Kovara Cênîyan ‘ELLE’ ya ke dinye de namdar a Valerîe Toranîan a ke di binê sernameyê “Xo ver bide” de nûşteyêke cênîyanê kurdan (Şerwanan) ser nûşto.
Toranîane nûşteyê xo de ardo ziwan û vato; “Cênîyê kurdan şerefe dinyayê.” û qalê cagirotişê înan ê di mîyanê şoreşî de kerdo. O vatişê aye zehf di ca de yo. Pratîkê ay awayî mîyanê şoreşê 40 serran de yeno veynayişî. Bêrvîna ke hemverê feodalî, Berîtana ke hemverê îxanetî, Zîlana ke hemverê înkarî û desthilatî, Sakînaya ke hemverê emperyalîzmî û eka zî Arîna ke hemverê dagirkerî têkoşîn kerd û xo feda kerd ramoştişê enî awayî yê.
Têkoşîn û rayîrê înan go cênîyanê heme dinya metakerdişê kapîtalîzmê emperyalîstan ra, objekerdişê desthilatî ra û kolekerdişê dîktatorî ra feletno. Belkî heta eka têkoşînê estbîyayîşê kurdan û şoreşê cênîyanê kurdan kêmî ameyo naskerdiş û famkerdişî la ena saeta ra weta go heme dinya baş bişnayo, binasno û baş fam bikero.
Lingêke na awa 40 serre verî amîbî eştişî, linga bîne zî şoreşê Rojawanî dir amî eştişî. Eka ra ro cênîyê kurdan û cênîyanê heme dinya pîroz bo. Xoverdayîşê Kobane bîyo temînatê yewîtîya şarê ma û azadîya welatê ma. Serkewtişê qehreman û xoverdayoxanê Kobane ro welat û şarê ma pîroz bo.
Nesrîn NAVDAR