ZEYNEP DURGUT JINNEWS /WAN Kurdîstan de her roje vera goristanan de hêrişî benî. Tewr peynî Goristanê Yenîkoyî yê Amedî de vera mezelanê şerwananê HPG û YPGyî de hêrişî bîyî. Derheqê hêrişan de Parlementera HDPyî ya Stenbolî Huda Kaya qisey kerde. Kayaye bale ante bawerîyan de manaya ruh û merdîye ser û wina va: "Tu dîn û kitabê dînan de hêrişê goristanan nêameyo nuştene. Metnê nuşteyî de zî yeno vatene ke kesê merdeyan eciz kene, bi tu hawayî nînî efû kerdene. Tena merdim nê her estene pîroz o.” Kayaye dîyar kerde ke polîtîkayê zulmî hertim erjê komelî hedef gênî û wina va: "Merdimê ke cuya xo vinî kenê, bedenê înan goristan de êdî emanetê merdimîye yî. Merdimî çiqas dişmenê yewbînan bibê zî hêrişê serê bedenî bi tu hawayî nîno qebûl kerdene. Sîyaseto ke îqtîdar domneno, beno sebebê hêrişê goristanan. Tirkîya de wextê definkerdişê cenazeyan de ma bi hezaran zehmetîyî antê. Nimûneya tewr girde hêrişê ke vera definkerdişê Hatun Altune de virazîyaybî û serê bedenê Ekîn Wane de bîyî. No hêriş seba Tirkîya şermêko gird bi. Hêrişê cenaze û goristanan merdimîye rê şermêko gird o." 'Ganî ma bîyarê vîrê înan' Kayaye qiseykerdişê xo de daye zanayene ke hêrişê goristanan dişmenîya vera estena merdimîye yo û wina va: "Beno ke ewnîyayîşê herkesî yew nêbo û beno ke bawerîya înan cîya bo, la na nîna aye mana ke kes hêrişê cenaze û goristanan bikero. Nika komelê Tirkîya de problemo tewr gird o yo ke merdimîye rizîyena. Ganî ma newe ra bihêz bikerê. Kesê ke merdimîya xo xo vîra kenî, ganî ma bîyarê vîrê înan."