Bi nay quwetê Meclîsê Lejkerî yê Minbic resyay çormeyê sûk û sondê ‘Badê jew hefte ma Minbic de resenê keyeyê mi’ yê fermandar Ebû Leyla ardî ca.
Quwetanê Meclîsê Lejkerî yê Minbic roja 7. yê operasyonî de 7 kîlometre rojawayê Minbicî de hetê cepheyê Tişrîn dewanê Feres El-Kerbîr û dewa El-Muhdîsê xelesnay. Cepheyê Qereqozax yê operasyonî zî 9 kîlometre dûrê Minbicî de dewanê El-Biwêr, Bor Kîc û Cib El-Kelb çeteyan ra kerd pak. Pirodayişan de 26 çeteyê DAIŞ kişiyayî û xêlê cebilxaneyê lejî kewt destê quwetanê meclîsî. Cepheyanê operasyonî 7 rojan de 39 kîlometre mintiqe çeteyan ra xelesna.
‘Tekoşîn kenime berz’
Lejwanê ke operasyonî de ca gênê aşkere kerdî ke îye dê Minbic bixelesnê û rîwalê vîrardena fermandar Ebû Leyla tekoşîn berzêr bikerê. Lejwanan ra Xalid Hessen hayr ant muhîmîya xelesnayişê Minbic ser û aşkere kerd ke Minbic serva çeteyanê DAIŞ zey lûleya solixî ya. Hessen’î da zonayen ke bi xelesnayişê Minbic rayê teqwîyeyê lejkerî û lojîstîk yê DAIŞ do bibirnîyo. Hessen’î vist vîrî ke bi girotişê na ray vernîya çeteyê ke Sûrîye ra şinê Awrûpa û ewja de êrişanê gonîn virazenê do bîro giroten.”
Lejwanê bîn yê Meclîsê Lejkerî Ebû Yasser’î zî da zonayen ke bi xelesnayişê Minbic çeteyê DAIŞ dê hardê Sûrîye ra bîrê veten. Yasser’î vist vîrî ke Minbic serva DAIŞ hendê Musil û Reqa muhîm a û nîya dewam kerd: “Minbic sûka girdêr a hîrêyîn yê Sûrîye ya. Hemleya xelesnayişê Minbic’î de gam bi gam nezdîyê serkewtiş benê.
ANF/MINBIC