Mam Zekî wexto ke Celle de yew fabrîka de karker bi, PKK şinasna û nizdîyê ro serran sey endamê Tevgerê Azadîya Kurdistanî bêmabên xebetîya. 4 serrê peyênan de zî Êzidxan de têkoşînê xoserîye û Êzidxanê Demokratîke de xebetîya û heta şehadetî qet nêvindet.”
Zekî Şengalî (Îsmaîl Ozden) serra 1952î de qezaya Qubînî ya Êlihî de dewa Şimzê de ameyo dinya. Dewe de dibistanê sifteyîne û mîyanên temam kerd. Şengalî heta 17 serreyîya xo dewe de mend û 17 serreyîya xo de bi dawetê birayanê xo şi Almanya. Şengalî bajarê Celle yê Almanya ke zafaneyê êzidîyî ewja de kom bîyî de bica bi. Şengalî tîya de dest bi xebatan keno û 1978 de sempatîzananê PKKyî şinasneno û dima ra o zî beno sempatîzanê PKKyî. Eynî serre Hannover de beşdarê pîrozkerdişê Newroze beno.
Şengalî hetêk ra fabrîka de sey karkerêk xebetîyeno heto bîn de bi embazanê xo yê êzidîyan dest bi propoganda keno. 1981 de Celle de Komeleya Karkerê Welatperweranê Kurdistanî yena awan kerdene û Şengalî beno serekê awankarî yê komele. Şengalî awanbîyayîş û amadekarîya nuşteyan ya kovara Serxwebûnî de zî ca gêno. Şengalî serra 85î de şono warê gerîla û Rayberê Şarê Kurdî Abdullah Ocalanî şinasneno. Dima ra qerarê beşdarbîyayîşî gêno û serra 87î de bi temamî beşdarê gerîla beno. Şengalî ra dima lajê ci Sîpan zî beşdar beno û 92 de Mêrdîn de şehîd keweno.
Şengalî dima ra reyna şono Ewropa û heta Komploya Mîyanneteweyî Ewropa de xebatan de ca gêno. Labelê komplo ra dima reyna agêreno koyanê Kurdistanî. 3ê Tebaxa 2014î ra dima derbazê Êzidxanî bi û heta şehadetê xo bi şewe û roje seba Êzidxanî xebetîya.
Cewabo tewr gird rêxistinbîyayîş o
Şengalî 30ê Hezîrana 2016î de Çira TV de beşdarê programêkî bi û wina vatbi: “Sey heme komelan, heqê êzidîyan zî esto ke xo rêxistine bikerî û beşdarê sîyasetî bibî. Vera heme dej, zehmetî û qetlîyaman de cewabo tewr gird têkoşîn û rêxistinbîyayîş o. Êzidîyî xeylê zehmetî û dejê girdî cuyayî, labelê fek erd û bawerîya xo vera nêdayî. Ganî tena yew êzidî zî bimano nêvinderî û xo rêxistine bikerî.”
Ganî ma ser reyanê xo de pîl bibî
Şengalîyî hertim êzidîyan ra wina vatêne: “Welatî teriknayîş yan zî nêagêrayîşê welatî çare nîyo. Yê ke azadîya êzidîyan pê bîyarî, êzidî bi xo yî. Yewîya kurdan a. Eke komelêk xo rêxistine nêkero, ê komelî ser o tehdîd û tehlukeyî nêqedîyenî. Ganî ma vila nêbî û biagêrî welatê xo û reyanê xo ser o pîl bibî. Ganî ma yewîya xo Şengal de awan bikerî û pawitişê xo yo cewherî awan bikerî.”
ANF / BRUKSEL
Temamê êzidîyan dormeyê PKKyî de yî
Şengalîyî 22ê Teşrîna peyêne de serra 40. ya PKKyî ser o qisey kerdbi. Şengalîyî wina vatbi: “Komelê êzidîyan de neheqî, zext û înkarî rê ca çin o. Cok ra êzidîyî xo nizdîyê felsefeya Ocalanî vînenî. Hêrişê netewdewlete û mezhebî ser êzidîyan de texrîbatê girdî viraştî. Êzidîyî ameyeyê xo PKK de vînenî. Êzidîyî vanî PKK seba ma vejîyayo orte. Tayê îstîsnayî netede, temamê êzidîyan dormeyê PKKyî de kom bîyî. Rayber Apoyî 2007 de vatbi ‘ganî şima Şengalî bipawî, pawitişê Şengalî, pawitişê Kurdistanî yo’. Yê PKK ardo Şengal, felsefe û îdeolojîyê Rayber Apoyî yo.”