Gerîlaya Tevgera Apoyî, şervana azadiyê Xelat beriya derbasî Bakur bibe wiha dibêje: “Navê min Xelat Gorsê. Sala 1982’yan li Mêrdînê hatim dinyayê. Sala 1999’an tevlî nav refan bûm. Ez ji Amedê hatim nav refan. Ez demekê li wir mam. Bi pêvajoya paşvekişandinê re derbasî Başûr bûm. Ez niha jî li ser rêya Botanê me. Ez diçim Botanê. 

Em di pêvajoyeke pir giran re derbas dibin. Hem li ser Rêbertiya me, hem li ser gel û hem jî li ser tevgera me êrîşeke pir zêde heye. Em jî dixwazin bi çûna Botanê re bersivê bidin vê pêvajoyê. Sala 1999’an dema ji Amedê tevlî bûm, demekê li wir mam. Li wir pratîkeke min a nîvco mabû. Niha dixwazim biçim wir û wê pratîka xwe ya nîvçe temam bikim. Min dixwest careke din biçim Amedê, lê rêxistinê Botan guncaw dît. Niha jî dixwazim biçim wir û li wir ji pêvajoyê re bibim bersiv. Wek xwendekareke Akademiya Şehîd Bêrîtan me li vir lêhûrbûneke xurt kir û niha em dixwazin biçin, vê lêhûrbûnê bixin pratîkê û bi vî awayî bibin bersiv. Ez ji vê yeqîn dikim ku bi hêza me ji vir girt, em ê bibin bersivek jî. Hewce nake mirov tiştekî cudatir bêje. Ji ber tiştên hewce ye bên gotin, hevrêyên me yên bi qehremanî şehîd ketin gotin. Bi taybet di şexsê hevrê Şehîd Viyan de dikarim vê bêjim. Têkoşîn, sekn û kesayeteke çawa hewce dike, li gor pêvajoyê ew hatin destnîşankirin û em niha dixwazin li gor wê tevlîbûnekê çêbikin. Li ser vî esasî ez ji hevalên ku li vir dimînin re serketinê dixwazim. Ez yeqîn dikim ku em ê bi têkoşîna xwe li wir bersivê bidin dijmin.” 

Bi birayê xwe ve pir girêdayî bû

Hevrêyeke gerîla Xelat, têkildarî jiyan û têkoşîna Xelat wer behsa wê dike: “Hevala Xelat her çi qasî li Amedê mezin bûbe jî bi eslê xwe ji Mêrdînê ye. Di temenekî biçûk de dikeve zindanê. Dîsa birayekî wê sala 1991’ê ku tevlî dibe, sala 1994’an li Amedê şehîd dikeve. Birayê wê ew bi partiyê re dabû naskirin, lewma pir bi birayê xwe ve girêdayî bû. 

Birayê wê li Amedê şehîd dikeve. Ji ber vê xeyalê hevala Xezal eyaleta Amedê ye. Yekemîn cihê lê maye jî Amed e. 

Çavên wê mîna brûskê bûn 

Di hevala Xelat de tişta herî zêde bala min dikişand çavên wê bûn. Çavên wê yên kesk mîna brûskê bûn. Çavên nêzî xwezayê bûn. Û bi rastî jî mîna brûskê lê didan. 

Hevrê Xelat, di êşkenceyên zindanê de dijmin baş nas kiribû. Ew rastiya faşîzan nas kiribû. Lewma tecrûbeyên xwe timî ji ciwanan re radigihand. Ciwanan zêde rastiya dijmin nas nedikirin. Ew bi israr bû rastiya dijmin fêrî ciwanan bike. Yek jî bi giştî aliyên wê yên fêrkariyê xurt bûn. 

Pîvanên pir xurt ên hevrê Xelat ên rûniştî hebûn. Pir kamil û gihiştî bû. Giraniyek wê hebû. Cidiyeta xwe bi sekna xwe nîşan dida. Yek jî jiyana wê pir bi disîplîn bû. Di PKK’ê de ku em jê re dibêjin, xwe disîplînekirin, xwe bi xwe terbiyekirin bi awayekî muezem pêk dianî. 

Dîsa pir girîngî dida rêxistinbûnê. Rêxistinbûn ji bo civaka Kurd bike hêz pir dida pêş. Civakîbûn bi awayekî ku dihat maneya rêxistinbûneke xurt gelekî zêde li ser diponijî. 

Evîndara Kurdistanê bû

Hevrê Xelat di pêvajoyên ku di destê dijmin de mabû rêyek ji xwe re diyar kiribû. Bi tena serê xwe jî maba wê xwe rêxistin kiriba. Dîsa bi tena xwe jî maba wê mirov bandor kiriba. Û ev bi awayekî pir xurt pêk dianî. 

Hevrê Xelat 31’ê Gulana 2007’an li qada Kela Memê ya Botanê bi komek hevrêyên xwe re tevlî karwanê şehîdan bû. Her çi qasî xeyalê wê Amed jî bû, wek keseke evîndara Kurdistan, her cihê welêt pîroz didît.” 

Bila stêrk bi ser te de bibarin hevrêya min a xweşik…

Şeh bike pora xwe keça rûken


Bêyî mûyên pora xwe yên spî bûne bihejmêrî


Bêyî sedema wê pirs bikî


Tijî mirine îro


Evîna min ji siberojan re ye


Min tijî kiriye hezkirinên xwe


Êş tesîrê li min nakin


Binihêre li çavên min


Ji şînahiya biharê hê şîntir e


Bi bêdawîbûnê xwe xwedî dike


Gelek îsyan dîtin bedena min


Dizane li ber xwe bide


Heta ku ev dil di beden de bisekine


Eger behnek be jiyan


Wê şevê jî kun bike


Bi agirê hêviyê
Wê ronî bike berbangê...

Rêberê Gelê Kurd Abdullah Ocalan der barê cangoriyên Kurdistanê de wiha dibêje: “Ev nirxên wiha ne ku bandorên wan dikare sedsalan dorpêç bike. Vaye di têkoşîna me de qîmetê rastî yên şehîdên me wiha ye. Em bersivê bidin û wezîfeyên ku vê maneyê daniye ser milê me em bi serketineke mezin bînin cih!”



Nasnameya şehîd

Nasnav: Xelat Gorsê 


Nav û Paşnav: Cîhan Ûnat 


Dîrok û Cihê Jidayikbûnê: 1980 Qoser/Mêrdîn


Navê Bav û Dayikê: Mehmet Necîm- Xalîse 
Navê 

Dîrok û Cihê Tevlîbûnê: 1999/Amed 


Herêmên lê maye: Amed, Qendîl, Metîna, Zap, Botan


Dîrok û Cihê Şehadetê: 31’ê Hezîrana 2007/Botan/Kela Mem


YEKTA ŞOREŞ