Nûmayişo ke hetê Meclîsa Êzdîyanê Şengal ê Dîaspora ke seweta serbestîya Rayverê Şarê Kurd Abdullah Ocalanî Strasbûrg de destpa kerd 17 rojî pey xo de terna û ewro roja 18. de bi qerardariyeke gird rameno. Nûmayiş raştê eleqe û zîyaretê gird yê Kurdistanijan yena. Her roj sûkanê ciya yê Awrupa ra bi desan kurdî û dostê ci şinê zîyaretê nûmayişkaran.
Heto bîn ra nûmayişkaran Komîteyê Verîgirotişê Îşkence CPT rê zî nêrazîbîyen û hêrsê xo damûsnay. Serokê Meclîsa Şengal ê Dîaspora Fîkret Îgrek dûştê CPT hêrsê xo ard zon û aşkere kerd ke ‘eke bêvengiya saziyanê Awrûpa dewam bikero do nûmayişê çalekîya grevê veyşanî hera bibo, xeylê kesî bînî kî dê tewrê nûmayişî bibê.’ Igret hayr ant ke Strasbûrg do bibo qeleya xoverdayişî û saziyanê CPT û Konseya Awrupa ra waşt ke bikewê dewre.
Qamişlo veng da Amed
Seba rewşê Rayverê Şarê Kurd Abdullah Ocalan'î kurdê ke Rojawayê Kurdistan de ciwîyenê zî kewtî hereketî. Bi rojano Kantonanê Rojawa de welatijî ser payan ê û bi nûmayişanê cîya hayr ancenê rewşê Rayverîye xo ser. Bi no wesîle sûka Qamişlo de zî nûmayişê grevê veyşanî ke destpa kerd rameno. Grevê veyşanî rê cenî û gencî rayverîn kenê. Rojawayê Kurdistanî de bi rojano seweta azadîya Ocalanî nûmayişî virazîyenê. Na çarçove de, Qamişlo de zî, nûmayişê grevê veyşanî destpa kerd.
Sînorê Bakur û Rojawa de
Grevê veyşanî bi rayverînê Kongreya Star û Yewînê Gencanê Rojawa de virazîyeno. Çalakgeran nezdiyê sînorê Bakur û Rojawa de, taxa Hilêlî de xêm ronay û destpa grevê veyşanî kerd. Bi seyan welatijê ke şinê ziyaretê nûmayişkaran waştena azadîya Ocalan'î bi slogananê zey "Bê Serok Cuyayiş Nêbeno” qîrenê. Meclîsa Keyeyanê Şehîdan û Meclîsa Qamişlo ra zî, xeylê kesî tewrê çalakî biyê. Îdarekara Kongreya Star Welîde Botî nûmayiş de qisey kerd û da zonayen ke iyê zî zey leteyanê bînan yê welatî, dormeyê Rayverê xo de benê jew. Komîteyê Hedreyin zî aşkere kerd ke grevê veyşanî yê înan do 7 rojan biramo.
STRASBÛRG/QAMIŞLO