Qezaya Sûrî ya Amedî de bi aşman qedexeyê tebervejîyayîşê kuçeyan dewam kerd û çarçewaya qedexeyî de qerarê îstîmlaqî amebî girewtiş û 6 taxê qezaya Sûrî bi temamî ameybî rijnayîş. Tewr peynî taxê Alîpaşa û Lalebeyî ke qet tede pêrodayîş nêqewimbîyabî zî girîyabî çarçewayê îstîmlaqî û no het de seba ke şarê taxî keyeyanê xo ra bivejyî, ameybî tehdîtkerdiş.
Verê cû dewlete şarê taxe bi birnayîşê awe û cereyanî waştbî ke wa şar mecbûr bimano keyeyanê xo ra bivejîyo. Labelê taxijî bi piştîdayîşê şarê Amed û Kurdistanî nê qerarî dabî vindarnayîş. Nika vejîya orte ke dewlete reyna şarî ser de polîtîkaya vengkerdişê taxe dana meşnayîş. Na çarçewa de dewlete şarî ser de tehdîdê birnayîşê awe û cereyanî xebetnena. Ame musayîş ke ewro ra tepîya do awe û cereyanê şarî bibirnî.
Pereyê xo bigîrî û bivejyî
Nika nê taxan de ekîbê rijnayîşî dest bi rijnayîşê garajê şaredarîya kehene kerdî. Goreyê vatişê taxijan, xoverdayîş ra dima demêko derg bî ke awa înan nêameybî birnayîş, labelê Walîtîye bi telefon welatîyan gêrayo û welatîyan ra vato ‘pereyê şima banka de yo, pereyê xo bigîrênê û vejîyênê’. Kepçeyê ke kewtî taxe serê sibayî saete 7.00 de dest bi rijnayîşî kenî û heta hela şande saete 17.00 rijnayîşî domnenî. Rijnayîşan de polîs û wesayîtê zirxinî zî ca gênî.
Esnafî raştê tacizanê polîsan yenî
Heto bîn ra rijnayîş ver her ke şono rewşa esnafanê qeza zî xirab bena. Esnafî raştê tacizanê polîsan yenî. Badê ke dinya bena tarî, polîsê tîmê taybetinî dewrîye erzenî û esnafê ke dikanê înan akerde yo tehdît kenî û vanî ‘çira şima dikanê xo heta na saete akerde verdanî?’
DÎHABER/AMED