Keyeyê ke qedexeyê tebervejîyayîşî ra dima taxa Alîpaşa û Lalelebeyî ya qezaya Sûrî de ameybî vengkerdiş nika yew bi yewe yenê rijnayîş. Kesê ke taxe nêteriknayî hêrişan reyde rî bi rî manenî. Hemwelatîyê taxe keyeyanê xo nêteriknenî û xover danî. Kesê ke na rewşe ra tewr zêde tesîr benê doman î. Domanê Alîpaşa bi hûyayîşê xo reng danê taxe û kuçeyan de vazdanî.Domana bi nameyê Hatîce, Ummu Gulsum Kaya û Meryem Kizilaslane qisey kerdî.
Heme embazê mi tîya ra şîyî û tena ma mendî
Hetîceya ke birazayê xo reyde kayan kay kena, qiseykerdişê xo de wina va: “Kuçeyan de qet domanî nêmendê. Heme embazê mi tîya ra şîyî û tena ma mendî. Ma heme vila bîyî. Ez nêwazena ke tîya ra şêra. Wa keyeyê ma nêrijnî. Keyeyê ma pîl o û hewşê ma zaf weş o. Hewşê ma de darê ma estî. Sewbîna cayan de nê çîyî çin î.”
Ez hewnê xo de embazanê xo vînena
Kayaye wina va: “Ez bêrîya embazanê xo kena. Ma kuçeyan de kaya xo nimitişî kay kerdêne. Verê ma şîyêne keyeyê yewbînan. Nika kesêk nêmendo. Ez Sûr û Amed ra zaf hes kena.” Tewr peynî Kizilaslana 10 serreyî ke tena kuçe de kay kena, qisey kerde û wina va: “Embazê mi tîya ra şîyî. Keyeyê înan ameyî rijnayîş. Ez hewnê xo de embazanê xo vînena. Mi zaf bêrîya embaza xo ya Ela û Meryeme kerda. Werekna ê zî tîya de bibîyênê.”
DÎHABER/AMED