Verra taxanê Firat, Dîcle, Abdulkadîrpaşa sereştişê çeteyanê AKP rameno. Nisêbînijê ke verra terora dewlet teslîm nêbenê, doştê sereştişan ser payan de yê. Tîmê teybet yê dewlet wesayîtê zirxî yê tîpê kobra ra gule erzenê verra mehleyan.
Nê hardî yê ma yê
Nisêbînijî rexmê hewayê serdîn verr barîkatê ke ronayê de 24 seatî nobet gênê û wayrê îdareyê xoser vejyenê. Welatijan ra Mehmet Selîm Ercîk ano ziwan ke, îye verra sereştişan pawitenê xo gênê. Ercîk vano: Nê hardî yê ma yê. Ma dê heta nefesê xo yê peynî hardê xo bipawe. Ercîk aşkere keno ke, ê xo, mehleyanê xo û ameyina qeçikanê xo pawenhe.
‘Çeteyê DAİŞ zî tiya de yê’
Welatijo bîn, o ke bi rojano verra sereştişan nobed gêno Mehmet Akçîn zî ano ziwan ke, kesê ke êriş kenê, zerreyê înan de çeteyê DAİŞ zî estê. Ma serva ke taxanê xo bipawê nobed gênê û wina vano: Ma dê heta peynî welatê xo bipawe. Cayo ke ma ver kêberê-berê kesê bînan de bimirê, ma hardê xo de, bi tekoşîn dayiş mirenê hin rindo.
Dêrik de 'qedexe' hewadiya
Qezaya bîn Dêrik de 'qedexe'yê vetişê kuçe vizêr roja 9. de hewadiya. Barîqat û wesayîtê zirxî yê ke dekewtişê qeza de roniyay, peyser anciyay. Badê serkewtişê xoverdayenê xo, şar vejya meydanan.
Qeza de 27'ê Mijdar'î de 'qedexe' ame îlan kerdin. Quwetê dewleta kolonyalîst qeza girot bin abluqe, ceyran, aw û xetê telefon û înternet birnay. Peycoy destpa êrişê ronişteyan kerd. Çeteyanê AKP him bi wesayîtanê zirxî, him bi topanê hewan, him kî bi helîkopteran eşt qeza ser. Xeylê keye amey rijnayen û veşnayen. Welatijan ra waziya ke keyeyê xo terk bikerê û goç bikerê. La Dêrikijî verniya terora dewlet peyser gam nêeşt, rexmê merdiş, heta peynî xover da.
'Verra şar herb nêkewno ser'
Vizêr nê perey Hemserokê DBP Kamûran Yuksek ra piya heyetê DBP û HDP şî qeza û tewrê xoverdayen bî. La polîsan bi bombeyanê gaz êrişê heyetî û şarî kerdî. Rexmê nê êrişan heyet dekewt qeza û tewrê xoverdayen bi. Vizêr zî bi hezaran Dêrikijî vejyay meydanan û serkewtişê xo bimbarek kerdî. Hemserokê DBP Kamûran Yuksek'î aşkere kerd ke, AKP nêşkena no herbî de serkewo. Verra şaran herb nêkewno ser. Yuksek'î va: Xosereyê demokratîk heqê rewa yê şarî yo û hikûmet ra waşt ke desinde sereştişan ra fek virado.
Sûr de şar bi qetlîam ra rî bi rî yo
Qezaya Amed Sûr de dewlet 2'ê Kanûn'î de 'qedexe' yê vetişê kuçe rona. Badê îlankerdenê 'qedexe' tîmê teybet kewtî hereket û qeza bi tifinganê giran bombevaran kenê. Vizêr seatanê sodir de, welatijo bi nameyê Mehmet Demîrel kişiya. Semedo ke çeteyanê AKP destûr nêda, cenazeyê Demîrel bi seatan mehle de mend. Netîceyê sereştişan de xeylê keyeyan xesar dî. Verra sereştişanê dewlet Sûr de zî şar xover dano. La, rîwalê bombekerdenan şar bi qetlîam ra rî bi rî yo.
Verra sereştişan nûmayiş
Amedijî verra sereştişanê quwetanê dewlet kewnê hereket û rêze nûmayişan virazenê. Nûmayişê protestoyî yê sifte ewro viraziyeno. Amedijî ewro seat 13.00'î de ver Parqa Koşuyolu de are benê û heta bana Walitî rayşinhe. Herzewbîn heta ke 'qedexe'yê dewlet wedarniyo nûmayişî dê dewam bikerê.
Heta bîn ra wendekarê 16 serrî Çekvar Çûbûk, o ke polîsan va 'terorîsto' û 2'ê aşmî de Sûr de qetilkerd, hetê embazanê ci yê mekteb ame definkerdin. Cenazeyê Guler Eroglu, a ke roja Çarşem Sûr de verra polîsan çalekî viraşt teslîmê malbata ci bî. Malbata Eroglu cenazeyê xo girot û berd Batman.
NAVENDÊ XEBERAN