Taxê Alîpaşa û Lalebeyî yê qezaya Sûrî ya Amedî no çend aşmî yo ke bê awe û cereyan veradîyenî û bi no hawa şar mecbûrê koçkerdişî yeno kerdiş. Reyna çend rojî yo ke nê her di taxî girîyayî binê abluqaya polîsan. Polîsî hewl danî bi zorî şarî keyeyanê înan ra vejî û lez dayî rijnayîşan. 

Taxê ke awe û cereyanê ci birîyaye yî, seba lazimîya awe camî û kîlîseyan xebetnayênê, labelê awe û cereyanê înan zî ameyî birnayîş. Nika welatîyî lazimîya xo ya awe bi varîlan peyda kenî. Wexto ke varîlê awe yenî merdimî varîlan ver de kewenî dore. Babete ser o taxijî qisey kerdî. 


Ez mirena zî nêvejîyena

Azîze Tosuna 55 serreyî ke 4 serrî yo tena sereyê xo Sûr de cuyena, bi hetkarîya taxijan debara xo kena. Tosune bi çimanê hesirinan wina vana: “Tena malê mi no keyeyo ke pîyê mi ra mendo yo. Eke ez tîya ra vejîya, ez do se bikera? Eke ez Sûr ra bivejîya, ez nêşena çadira ke sereyê xo deka binî, bivîna. Cok ra ez do Sûr nêverda, ez mirena zî nêvejîyena.”


DAIŞî vera kobanêyijan de wina nêkerdî

Fevzî Bîngolî zî va ‘no demêk o ma bê awe û cereyan cuyenî’ û wina dewam kerd: “Ez 40 serrî yo ke tîya de esnafî kena û banê mi tîya de yo. Ez na saete ra pey şona kura? Çîyê ke ma nika cuyenî, çi DAIŞî vera kobanêyijan de, çi zî Îsraîlî vera filistînijan de kerdî. Ma rojanê zehmetinan ra derbaz benî. Ma do keyeyê xo veranêdî. Seba vejîyayîşî pere peşnîyazê ma kenî, wa bêrî ez çend qatê ê pereyî bida înan û wa mi nêvejî. Ez nêşena sewbîna ca de bicuya. No zulm û xesp o.”


Ma fek Sûrî ra veranêdanî

Cinîya ciwane ya bi nameyê Rojda Ersoye zî dîyar kerde ke ‘Sûr açarîyayo zîndano akerde, labelê ê se kenî wa bikerî ma do Sûr veranêdî’ û wina domnaye: “Bi aşman o ke ezîyetê ma kenî. Merdim vera merdimî de wina nêkeno. Xora vanî musluman, labelê no kamcîn dîn de esto? Ma Amed ser înan de rijnenî, labelê reyna zî Sûr ra nêvejîyenî. Eke wina bikerî, ez destûr nêdana ke do cenazeya mi tîya ra bêra vetiş.”



Planê îmarî peygoş kenî

Hemserekê TMMOBî ya Şûbeya Amedî Fatîh Tekînî zî va ‘rijnayîş goreyê xusûsîyetê tarîxî yê Sûrî nîno kerdiş’ û wina dewam kerd: “Sûr bi viraştişê qereqol û rayîranê hîra do îmarî rê bêro akerdiş, no proje qet nîno qebulkerdiş. Ma do seba vindarnayîşê nê projeyî çi destê ma ra bêro, ma do bikerî. Wazenî bi mexdurkerdişî şarî Sûr veng bikerî. Vera nê zulmî de vindetiş wezîfeyê ma yo.”


Muracatî 10 rojan de yenî redkerdiş

Tekînî dewamê qiseykerdişê xo de qala muracatê ke seba vindarnayîşî yenî kerdiş, kerd û wina va: “Eke merdimî keyeyê xo bikirêşî sewbîna ca, do problemê maddî û manevî bicuyî. Ma sey Odeyê Mîmar û Plankarê Bajarî doza ke ma vera îstîmlaqkerdişî de akerd, mîyanê 10 rojan de ameye redkerdiş. Heto bîn ra dozê ke şarî vera rijnayîşî de akerdî, dewam kenî. Dozan ra qerarê bîyayeyî zî vejyî, edî mexdurîyetê şarî nêqedîyenî.” 



AMED - ANF