Nûmayişê paştdayen

Vizêr bi hezaran kesê ke ser vengdayisê HDP û DBP are bî, waştî hetê Sûr rayşirê. La polîsan şiyayiş manî kerd. Ser nayî nûmayişkaran Meydanê Îstasyon’î de nûmayişê ronişten viraştî. Nûmayişkaran sloganê ‘biciwyhe xoverdayena Sûr, her ca Sûr, her ca xoverdayiş’ berz kerdî. Badê nûmayişê ronişten, welatijan waşt ke hetê Sûr bikewê ray. La polîsan bi bombeyanê gaz êrişê nûmayişkaran kerd. 

Camî û cayê tarixî hedef de yê.

Tenya cayê tarixî nê, herzewbîn cayê îbadetxane zî bombevaran benê. Sûr de Camî ya Kurşunlu zî bî hedefê bombevaran û gulevurnayenê polîsan. Tîmanê teybet bi hewan û roketan eşt Camî û mînareyê ci ser. Goreyê zonayişan wextê bombevaran de zerreyê Camî de welatijî estbî û taynê ci bî dirbetin. 

Riwalê bombevaranan mînareyê camî xesarê gird dî. 

Çeteyê ke Erdogan’î ra ferman girotî Sûr de cayê tarixî kenê hedef. Tîmê teybet yê ke Sûr de bi rojano erzehê welatijan û banan ser, Hemamê Paşa zî hedef girotî. Netîceyê gulevornayen de Hemam’î adir girot û veşeno.

Heta bîn ra serva-semedê paştdayenê xoverdayişê Sûr hewldayenê Amedijan her hetî ra ramenê. Amed Yenîşehîr de, Keyeyê Demokratîk yê Azîzîye qabê-serva  ronişteyê Sûr werdiş pewjina û waştî werdişî berê Sûr. La Meydanê Şêx Seîd de hetê tîmanê teybet amey manîkerdin. 

Qeza de, vizêr ra tepiya welatijan  seat 18:00’î de destpa nûmayişê veng vetiş kerdî. Heta abluqeyê îşgal yê dewlet nêqediyo, nûmayişê veng vetiş do dewam bikero. 


Nisêbîn de polîtîkayê goçkerdin

Heta bîn ra qezaya Mêrdîn Nisêbîn de dewleta tirk 5. reynî ‘qedexe’ yê vetişê teber îlan kerd. Bi na raybaza herbê pêroyî dewlet wazena qeza veng-tol bikero. 

‘Qedexe’ yê 5. vizêr, 6’ê Kanûn de seat 07.00 de, mehle-taxanê Abdulkadîrpaşa, Firat, Dîcle û Yenîşehîr de dest kerd ci. Qeymeqamtiyê qeza veng da welatijan ke, goreyê na qerar hereket bikerê û nêvejyê kuçeyan. 

Badê îlanê ‘qedexe’ tîmanê teybet destpa kiştişê welatijan kerd. Çeteyanê AKP kuçeyê Lîyan yê mehleya Dîcle de wesayîta zirxî ra gule vorna ser welatijan û 3 kes kerd dirbetin. Dirbetinan ra 2’ê ci weşiya xo kerdî vinî.  Herzewbîn eynî taxî de welatijê bînî zî netîceyê êrişanê polîsan de bî dirbetin. Kesê ke waştî şirê yardimê dirbetinan zî bî hedefê polîsan. Polîsan bi guleyanê raşt eşt welatijan ser. 

Heta bîn ra, vizor wextê ravêrdinhe wesayîta zirxî de teqînayiş bi û 6 tîmê teybet giran bî dirbetin.  


DÎHA/NISÊBÎN/SÛR