Dewlete hetêk ra taxanê Alîpaşa û Lalebeyî bêawe û bêcereyan verdana û hetêk ra zî hewl dana mektebê Alîpaşa birijna. Herçiqas ke pêroyîya Kurdistan û Tirkîya de serra neweyî ya perwerdeyî dest pêkerde, labelê qezaya Sûrî ya Amedî de bitaybetî Taxa Alîpaşa de dest pênêkerd.
Babete ser o kesê ke taxe de ronîşenî qisey kerdî û vera rijnayîşan de reaksîyon nîşan dayî.
Bi nameyê Ozlem Durane de kesa ke welîya wendekarêkî ya, wexto ke halê doman û mektebî aye ra ame perskerdiş, wina va: “Domanan mektebanê cîya-cîyayan ser de vila kerdî. Xora mektebê bînî zî domananê ma qebul nêkenî. Ê mektebî domananê ma qebul bikerî, nêkerî zî ma do domananê xo nêerşawî ê mekteban. Çimkî ma nêşenî mesrefanê xo bikerî, ma do senîn domanan bierşawî? Ma do domananê xo nêerşawî mekteb.
Ti kes vengê ma nêeşnaweno?
Wendekaran ra Buşra Demîre zî va ‘wexto ke ma şî mekteb, ma ra vatî; çareyê sereyê xo ra biewnênê’ û wina domnaye: “Ma do senî biewnî. Şima mektebê ma ma dest ra girewt, ma zî do nêşêrî mekteb.”
Keyeyan zî reaksîyon nawit û wina vatî: “Madem ê rijnenî, ma zî do domananê xo nêerşawî mekteb. Xora Sûrî rijnayî, êdî çi wazenî? Ma ti kes nînan nêvîneno û nêeşnaweno?”
AMED