Serekê Baroya Amedî yo kehen Tahîr Elçî 28ê Teşrîna peyêna 2015î de Mînareya Çar Lingin ver amebî qetilkerdiş. Ewro serrgêra 2. ya qetilbîyayîşê Tahîr Eçîyî yo. Elçî mergê xo ra ver wexto ke cinîyêk reyde qisey kerdêne, kamerayan de asabî.
Elçîyî qiseykerdişî ra dima cinîye zî dawetê îzehetê çapemenîye kerdbî, labelê hîna yew deqa derbaz nêbîybî Elçî amebî qetilkerdiş. Babete ser o Samîye Ektîya ke aye roje Elçîyî reyde qisey kerde, serrgêra qetilbîyayîşê Elçîyî de qisey kerde.
Wexto ke Ektîye qala Elçîyî kena, qirika aye pirr bena û hesiran war kena. Ektîye wina va: “Elçî ame hetê mi û destê mi tepişt. Huya û mi ra va ‘ti şona kura?’ Dima ra Mînareya Çar lingin nîşanê mi da û va ‘ti no derheq de se vana?’ Mi nêşêna çîyêk vaja. Wexto ke tîya kîlîse bî, bierj bî. Hêrişê ke vera mînare de bîyênê nêameyêne qebulkerdiş. Ez yê ke wina kerdî şermizar kena. Mi xatir waşt û ez ewja ra aqitîyaya. Dima ra mi vengê sîlehan eşnawit. Ez agêraya ke ewja pirrê panzer û polîsî bîyî. Mi va se bîyo? Vatî ‘Tahîr Elçî şehîd kewt’. O merdimêko zaf bierj bî. No dej û derd nîno vîrîkerdiş.”
Fikiranê xo ver ame kiştiş
Ektîye dewamê qiseykerdişê xo de wina va: “Elçî fikiranê xo ver ame qetilkerdiş. O seba merdimîye têkoşîn da. O înkarbîyayîşê kurdan qebul nêkerd. Ganî kurdî herinda ci pirr bikerî û destûr nêdî ke qatilê ci kêfweş bibî. Eke Elçî nêameyêne kiştiş, beno ke rijnayîş bivindetêne. Ewja de bi desan ciwanî ameyî qetilkerdiş. Rijnayîş asan o, viraştiş zehmet o. Ewro tena Sûr de nê, Heskîf de tarîx, Dêrsim de zî tebîet yenî çinîkerdiş. Eke kurdî nêvindarnî, orte de çîyêk nêmaneno.”