Nifûsê taxa Uzundere ya qezaya Karabaglarî ya Îzmîrî 4 hezar o û zafaneyê taxe elewîyan ra pê yeno. Taxa Uzundere nika hedefê Şaredarîya Girdî ya Îzmîrî, Şaredarîya Karabaglarî, Îdareyê Konutê Komî yê Serektî (TOKÎ) û Emlaqê Mîllî de yo.
37 keyeyê ke kewenê kişta Şaredarîya Karabaglarî, 11 hezar û 305 ada yê ke aîdê Emlaqê Mîllîyî û 57 donime erd, seba viraştişê ‘Merkezê Kiriştişê Eşteyê Wişkî, Tesîsê Planê Asfaltî’ pêşkêşê Şaredarîya Girdî ya Îzmîrî ame kerdiş. No plan 9ê çilêyê 2017î de Meclîsê Şaredarî de qebul bî. Badê ke plan ame qebulkerdiş, hemwelatîyê taxe vera qerarî de reaksîyon nawitî. Hemwelatîyî 23ê hezîrane de şaredarî dayî mehkema. Prosesê doze de 37 keye û erdê ke aîdê Emlako Mîllî yî dewrê TOKÎ ameyî kerdiş û ewja de do AVMyî bêrî viraştiş. Babete ser o hemwelatîyî qisey kerdî. Mehmet Turkelî wina va: “Ma bi desan reyan seba tapu şîyî şaredarî. Şaredarîye ma xapênaye. Ma pê hesîyayî ke TOKÎ herinda keyeyanê ma de AVMyan virazena. TOKÎ muteahîdan dewlemend kena. Ma do keyeyanê xo nêdî TOKÎ.
Rant esto
Fîdan Elçîya ke 40 serrî yo taxe de cuyena, dîyar kerde ke ê nêwazenî keyeyê înan bêro rijnayîş û ê do heta peynî xover bidî. Nerîman Agire 45 serrîyo ke taxe de cuyena û daye zanayîş ke tena keyeyêk înan esto, o zî destê înan ra yeno girewtiş û wina domnaye: “Heta ke ma nêkişi nêeşkenî tîya ma ra bigîrî.” Hemwelatîya bi nameyê Cevrîye Demîrere va ‘wexto ke weçînayîş nizdî beno taxe debena û dima ra zî çew nîno’. Tewr peynî Erhun Kiliçî zî qisey kerd û va ‘Rant esto. Tirkîya de erj nêdîyeno merdiman’ û wina va: “Eke îdarekarî ma sey merdiman bihesibnayêne do wina zilm nêkerdêne. Ma do heta peynî xover bidî.”
DÎHABER/ÎZMÎR