Tayê wisar, Şengal û ez
Ez xo zana nêzana wisarî ra hes kena. Her wisar newede bena aşiq. Zerrîya mi xo kena zergûn. Royê min o budela sey çemanê wisarî ser de şono. Cuya mi bena boya gul û vilikan. Gul û vilikê Kurdistanê mi. Hele aşma Nîsane! A delaliya zerrîya min a. Pêro şilîyê Nîsane mi rê bimbarek ê. Ez sey ayînêk binê şilîya Nîsane de xo kena hit. Hinî hîskena ke pêro qilêrê nê dem û dewranê gewrî yo ke zeleqîyo mi ra binê şilîya Nîsane de beno pak. Şîlîya Nîsanê mi newe de zaynena. A maya min a her serrî ya. Mi newede ana dinya ye. Ez aye de zêdîyena.
Mi wisare welatanê bînan ra tenê dem kilm wisarêk Şamî û xeylê wisarê tirkîye dîyê. Mi wisarê Şamî ra tawo fam nêkerd. Teberê bananê betoninan mi çiyê nêdî. Eke şaş mebî mi des wisarê tirkiye dî. Ê wisarî seba mi surgin, bêwelatî, hesret, vileçewtî, nêçarî bî. Mi, ma pêy xo de nîyadênê ka doçikê ma esto? Ez sey astorade pêşbirke de bîya. Mi wendêne de wendênê. Seba ke ez îspat bikerî ke doçikê mi çîn o. Yanê travma bî. Xerîbîye bî. Ma mordem şikîno xerîbîye de tame bigêro. Veng veng nêvanê xerîbîya kambax e. La wisarê welatê mi? Wisarê koyanê welatê mi? Welatê min o ke sereyê însanan de çekuya cenetî viraşta. Sereyê însananê çolan de. Sereyê însananê qerec û kepêran de. Aye ra yo ke welatê mi, Kurdistanê mi ra hende gonî şona. Gonîya zelala çênanê xasekan û xortanê semtan.
Nika yewo ke qerec û kepêran ra ameyo kewto gonîya însananê min ê qemeran ê welatê min ê qemerî. Yew cinawuro ke tirkiye ra peyda bîyo. Tirk nîyo. Xo rê başûrê welatê mi ra hemkarêk viraşto welatê mi ra gonî anceno. Gonîya çênan û xortanê welatê mi. Biyê gonîwerê welatê mi. Kurdistanê mi. Nê wisarî de hurdî gonîweran linge eşta Şengalê dirbetinî ver. Înan va qey 3’ê Tebaxa 2014‘î de Şengal kîşt. Înan va qey, Şengal merdo. Şengal êdî bin emrê înan de yo. Xulam û koleyê înan o. Înan nêzana ke yew Rayber esto ke dara huşke keno zergun, keno kewe. Înan dî ke Şengal newe de beno zergun bi royê azad ey Rayberî û şerwananê ey. Coka nê wisarî de, reyna dest bi êrîşanê xo kerd. Waşt wisarê Şengalî biheremnê.
La şima bêrê wisarê Şengalî bivînê. Vila sura Nîsane ruyê Şengalijan rê hende weş huyena ke zerrîya Şengalijan a dirbetine kena şên û awan. Dejanê aye vîyarnena. Dosere de tîja homete hende weş vejîna ke. Şengalijan de qisey kena. Vana; ey komelo qedîm, ey komelo zerrîtenik, ey komelo ke hîna hometîya xo vîndî nêkerda, ez ê şima ya. Ez şima de zayên. Şima de şon xow ra. Gelîya Kersê perçeyêk cenetî ya. Domananê Êzidîyan ê çimrindekan, çimê înan hende rindekê ke mordem nîyadayîşî ra mird nêbeno, kena virana xo. Înan virana xo de seveknena. Nêverdana vergê harî înan biwerê. Mazerê gilê koyan û gerîsan kesk kesk çim şiknenê Şengalijan. Vanê; ê çiqas ma cira bikerê ma hende şax bidêrê.
Dosere de vayo honik can û royê Şengalijan vilêneno. Şengalijî înadê gonîweran hîna dosere de wurzenê ra verê xo danê tîja homete û dua kenê. Şengalijî û wisarê Şengalî xo ver ro danê.
