Endamê Komîteya Şar û Bawerîyan ya KCKyî Cîhan Erenî da zanayene ke her roje anketî yenî viraştene û wina domna: “Se ra 60 ra zêdeyêrê şarî wazeno ke wa rejîmê Erdogan û Bahçelîyî bêro bedilnayene. Yanî faşîstî binkewtî. Eke tayêna têkoşîn bidîyo, do her di zî şêrî çopgehê tarîxî.”

Endamê Komîteya Şar û Bawerîyan ya KCKyî Cîhan Erenî derheqê deklarasyonê 7 madeyin yê Rayberê Şarê Kurdî Abdullah Ocalanî û hêrişê dewleta Tirkî yê vera Başûr û Rojawanê Kurdîstanî ser o qisey kerd û mesajê muhîmî dayî.

Erenî da zanayene ke wexto ke merdim Îmrali ra ewnîyeno vîneno ke dewleta Tirkî senî yena îdarekerdene û wina domna: “Polîtîka û kerdişê Îmrali nîşan danê ke Tirkîya û hêzê komplogêrê bînî senî demokrasîya Rojhelatê Mîyanênî ra ewnîyenî. Yanî merdim vîneno ke kamcîn xeta sîyasî Tirkîya de hakim a û goreyê çi nizdîyê probleman benî.”

Erenî qala têkoşîno ke vera tecrîdê 8 serran de ame dayene kerde û wina va: “Ez şexsê Embaz Zulkufî de heme şehîdan reyna vîr ana. No xoverdayîş rejîmê Erdogan û Bahçelîyî dekerd mîyanê zehmetîyan. Reyna têkoşînê dayîkanê mexmelsipîyan zî xeylê zorî da înan. Reyna rejîmê Erdogan û Bahçelîyî weçînayîşê 31ê Adare de binkewtişêko gird cuya. Coka hewl da sere de qezaya Rezanî û sewbîna cayan de qayûmanê xo tayîn bikero. Stenbol de ame dîyayene ke êdî kam ke biwazo Stenbol qezenç bikero, ganî rayanê Kurdan bigîro. Ganî Kurdî hêzê xo hîna gird bikerî.”

Erenî va ‘weçînayîş ra ver çend pêvînayîşî ameyî kerdene’ û wina domna: “Weçînayîş ra dima heta nika qet avûkat û keyeyan ra ti kes nêşîyo Girawa Îmrali û no zî nîşan dano ke pêvînayîşî seba weçînayîşî dîyayî kerdene.

Reyna ame famkerdene ke AKP seba ke weçînayîş qezenç bikero, nizdîyê problemê Kurdan ke problemê tewr gird yê Rojhelatê Mîyanênî yo bîyo.”

Sey rejîmanê Hîtler, Musolînî û Frankoyî yo

Erenî qiseykerdişê xo de qala deklarasyonê Ocalanî ke 7 madeyan ra pê yeno kerde û wina va: “Rayberîya ma nîşan da ke o hîna nuqtaya prosesê Newroza 2013î de yo, labelê hîna zaf kûr bîyo û qerardar o. Seba ke îttîfaqê Erdogan û Bahçelîyî kewto rayîrê faşîstî, Rayberîya ma veng dayo şaranê Kurd, Tirk û hêzanê demokrasî. Ganî merdim wina fam bikero. Xora tayê Kurdî û hetê Tirkîya rejîmê Tirkîya raşt nêwanenî. Çimkî merdim wexto ke qiseykerdişê tayênan ra ewnîyeno, na raştîye vîneno.

Bitaybetî CHP ti vanî qey seba pakkerdişê AKP û MHPyî hereket keno. Coka Rayberîya ma vano ke ma eşkenî problemanê Tirkîya bi aqil, polîtîka û hêzê kulturî eşkenî çareser bikerî. Tirkîya de hewl dîyeno dişmenîya Kurdan bêro vilakerdene û Kurdî bêrî çinkerdene. Çend rojî verê ma hêrişo ke Trabzon de vera Kurdan de ame kerdene, dî. O faşîst ewja de vano ‘ganî Kurdî nêbî’. No faşîst kamî ra mûsa. Erdoganî ra. Çimkî Erdogan zî eynî vatişan seba şarê Colemêrgî vatbi.”

Tayêna têkoşîn do her dîyan zî bierzo çopgeh

Erenî qiseykerdişê xo de va ‘rejîmê Erdogan û Bahçelîyî sey rejîmanê Hîtler, Mûsolînî û Frankoyî yo’ û wina domna: “Ti ferqê nê rejîmî rejîmanê bînan ra çin o. Her roje anketî yenî viraştene. Se ra 60 ra zêdeyêrê şarî wazeno ke wa rejîmê Erdogan û Bahçelîyî bêro bedilnayene û sîstemê parlamenterî bêro awankerdene. Yanî faşîstî binkewtî. Eke tayêna têkoşîn bidîyo, do her di zî şêrî çopgehê tarîxî.”

Ganî ma armancê dewleta Tirkî xo vîra nêkerî

Erenî bale ant hêrişê dagîrkerîye yê dewleta Tirkî ser û wina va: “Dewleta Tirkî wazena Kurdan hemînan qirkerdiş ra derbaz bikero û çin bikero. Çimkî dewleta Tirkî wazena erdanê Osmanîyan reyna bigîro. Tirkîya nînan zî bi polîtîkayanê demderg kena. Bitaybetî meselaya s-400î ver mabênê xo û hêzanê mîyanneteweyîyan xirab kena ke ê destek bidî polîtîkayanê dagîrkerîye. Coka Kurdî binê tehlukeyêko gird de yî. Ma ancax bi têkoşînêko gird eşkenî nê tehdîdî werte ra wedarnî. Dewleta tirkî zî naye baş zana, coka sere de hêrişê gerîlayan kena û Başûr û Rojawan hedef gêna. Ganî ma qet amancê dewleta Tirkî xo vîra nêkerî û Vakur, Rojawan û Başûr de têkoşînê xo bikerî yewe. Gerîla xora xover dano. Na çarçewa de çalakîyê ciwananê başûrijan bimana yî. Labelê ganî hîna zaf bêrî girdkerdene.”

 ANF/BEHDÎNAN