KCD vat ke hepso sîyasî Zulkuf Gezen seba bal antişê tecrîdo mutlaq ra roja Qirkerdişê Helepçeyî de cuya xo da, ê şexsê Zulkuf Gezenî heme hepsê sîyasî ke cuya xo dayê bi rêze vîr anenê û tecrîd verê çareserîya demokratîke asteng o.
8ê teşrîna 2018î de bi rayberîya Leyla Guvene seba şikitişê tecrîdê Rayberê Şarê Kurd Abdullah Ocalanî çalakîya vêşanî amebî destpêkerdiş û çalakîya bi hezaran hepsê sîyasî zî hetkarî dabî. Na çalakî ra seba hetkarîye bi rayberîya Zulkuf Gezenî zî çalakîyê fedaî ameybî kerdiş.
Serrgêra çalakîya fedaîyî ya Zulkuf Gezenî ser o KCDî aşkerayêk da. KCD aşkeraya xo vat ke seba şikitişê tecrîdî çalakîya 200 rojê ameybî kerdiş, banê HDPê Amedî de zî bi beşdarîya wekîlê HDPî yê Dêrsim Dag, Tayyîp Temel û Murat Sariagacî çalakîya vêşanî dest pê kerdbî û wina vat: “No proses de îqtîdar bertekê demokratîke ra qet texemmul nêkerdbî û bi hezaran kesan girewtbî binê çiman. Dayîkê Laçîkê Spî ra zî verê çimanê dinyaye de polîsan zilm kerdbî la seba hawanayişê tecrîdî zî îqtîdar gamêk nêeştbî û çalakîyê vêşanî zî verçiman nêgirewtbî.”
Dayikê Laçîkê Spî ra zilm
KCD bal ant çalakîya Zulkuf Gezenî û wina domna: “Hepisxaneyê Tîpa F ê Tekîrdagî de hepso sîyasî Zulkuf Gezen 16ê adara 2019î de seba bal antişê tecrîdo mutlaq ra roja Qirkerdişê Helepçeyî de cuya xo dabî. Peynî zî hepisxaneyê Gebzeyî de Ayten Beçet, Hepisxaneyê Erziromî de Zehra Saglam, Hepisxaneyê Mêrdînî de Medya Çinar, Hepisxaneyê Osmanîye de Siraç Yuksel, Hepisxaneyê Şakranî de Yonca Akici, Hepisxaneyê Xarpêtî de Mahsum Pamay seba şikitişê tecrîdî cuya xo dayê. Hewna Almanya de Ugur Şakar û Umît Acar zî laşê xo dayê ver adirî. Ma şexsê Zulkuf Gezenî heme hepsê sîyasî ke cuya xo dayê înan bi rêze vîr anenê. Tena waştişê înan estbî o zî hawanayişê tecrîdî bî, çimkî tecrîd verê çareserîya demokratîke asteng o.”
Dawetê têkoşînî kenê
KCD aşkera kerd ke peynîya nê çalakîyan malbat û avûkatan Birêz Ocalanî reyde pêvînayiş kerdê û wina qedîna: “Çi heyfo ke îqtîdar hewna rojdemê xo ra tecrîd girewto û vistişê dewreyê tecrîdî qerarêko bi şaş o. Ma heme komelê netew û mîyanêneteweyî ra veng dane ke hîna bi zaf vînî nêkerdişê cuya merdimî ser o bi lezî tecrîd bêro hawanayiş û Birêz Ocalan malbat û avûkatê xo reyde bi şeklo raştîn pêvînayiş bikero. Ma seba aştîya bi rûmetî her kesê dawetê têkoşînî kenê.” MERKEZÊ XEBERAN