Şarê Kurd jî bi çalakiyanê ciya ciya nêrazîbiyayinê xo mûsneno û wastenê azadiyê Ocalan’î ano ziwan. Platformê qandê aştî Ocalan’î rê azadî jî, vera siyasetê tecrîdî Estenbol de kom bi.
Kombiyayişî de siyasetê tecrîdê vera Ocalan’î zey îxanetê vera demê çareserîn hesibiya û waziya ki peyniyê tecrîdî biyariyo. Eynî wext de endamanê platmorfî qerar girot ki, 11’ê tîrmeh de, bi kesanê “Vengdayişê qandê azadiyê Ocalanî” de ca girotbi kombiyayişê virazo. Ê kombiyayişê 11 tîrmeh de, bi wastenê tecrîd hewadiyo, viraştinê çalakiyanê ciya plan bikiro.
Teker: Kerdenê vera Ocalan’î, kerdenê vera heme kurdanê
No maben de endama platforma qandê aştî Ocalan’î rê azadî Zubeyde Teker qisey kerd û bi ziwanê tûja tecrîd protesto kerd. Teker tecrîdê vera Ocalan’î, zey kerdenê vera kurdanê her 4 letanê Kurdistanî hesibina û wast ki, rojê ravey peyniyê siyasetê tecrîdî biyariyo.
Ayna: Siyasetê lej peyniyê AKP jî biyaro
Endama platformî û Hevseroka DBP’î Emîne Ayna jî nêrazibiyayinê tûj mûsna siyasetê tecrîdî û kerdenanê dewleta tirk ê vera Ocalan’î. Ayna tecrîdê vera Ocalan’î zey leteyê siyasetê lej ê AKP hesibina û vat: “Siyasetê lejî senî peyniyê partiyanê zey DYP, ANAP û DSP ard, eki AKP jî siyasetê lejî biramo, peyniyê ay jî bêro.”
Emîne Ayna qandê peyniyê siyasetê lejî biyaro veng da AKP û vat, gerek pêdiyinê bi Ocalan’a cayo ki mendîbî dewam bikirê.
NAVENDA XEBERAN