Nizdîyê 2 serrî yo ke Rayberê Şarê Kurd Abdullah Ocalanî ra ti xebere nîna girewtiş. Verê cû derheqê Ocalanî de tayê xeberî ser medyaya komelkî de ameybî parekerdiş. O wext ra nata kurdî û dostê kurdan bitaybetî Kurdistan û Ewropa de û xeylê welatanê dinya de payan ser de yî û seba weşî, ewleyî û azadîya Ocalanî çalakîyan virazenî.
Nê çalakîyan ra yewe zî çalakîya grevê vêşanîye ke hetê Dayîkê Aştîye ra dîyaybî destpêkerdiş bî. Çalakîya grevê vêşanî ke 9 rojî verê dîyaybî destpêkerdiş vizêr bi îzehetêko nuştekî ameye qedênayîş.
Qedênayîşê çalakîye ra ver Verfekê HDPyî Ayhan Bîlgenî û Hetkara Hemserekîya HDPyî Fatma Kurtulane çalakgêran zîyaret kerdî. Wextê zîyaretî de Verfekê HDPyî Bîlgenî qiseykerdişêk kerd. Bîlgenî qiseykerdişê xo de va ‘ganî merdim çalakîye pîroz bikero’ û wina domna: “Çimkî têkoşînê azadîye yê şarêk ancax bi wayîrvejîyayîşê îradeya xo manîdar beno.”
Astengkerdişê newetî yo
Bîlgenî dewamê qiseykerdişê xo de bale ante domnayîşê tecrîdî û netîceyê ci ser û wina va: “Tecrîd tena aştîya mîyanêne ya Tirkîya tehdît nêkeno, çinîhesibnayîşê îradeya kurdan o zî. Tecrîd tena çinîhesibnayîşê îradeya kurdan zî nîyo, vernîya bedilîyayîşanê Rojhelato Mîyanên de astengbîyayîş o. Eynî wext de vernîya ameyoxa şaranê Rojhelato Mîyanênî de astengbîyayîş o.”
ANF - ANQARA