Tecrîdo ke 18 serrî yo ke Rayberê Şarê Kurdî Abdullah Ocalanî ser de yeno meşnayîş, mîyanê serrêka peyêne de hîna zaf ameyo kûrkerdiş, avûkat û keyeyê Ocalanî rewşa tecrîdî ya Ocalanî sey ‘vînîbîyaye’ şinase kerdbîy. Babete ser o Însîyatîfê Dayîkê Aştîye yê Stenbolî qisey kerdî.
Dayîka Aştîye Ezîne Dale va ‘mîyanê serrêka peyêne de Ocalanî ra bêxera birayê ci ti xebere nêameya girewtiş’ û wina dewam kerde: “Ocalan seba şaran kilîtê demokrasî û aştî yo. Rayberî tena seba kurdan nê, seba rizgarîya tirkan zî muhîm o. Tecrîdo ke Rayberîya ma ser de yeno meşnayîş, vera heme şarê kurdî de yeno meşnayîş. Ganî tecrîd bi hawayo rew bêro wedarnayîş. Wa Erdogan û AKP ti kesî nêxapênî û wa ê bi xo zî nêxapyî. Şarê kurd xoverdakar o û do heta peynî xover bido. Şarê kurd fek Rayberîya xo ra vera nêdano. Eke Ocalan nêbo seba şarê kurd manaya çîyêk çin o.”
O wext nêvindeno
Dayîkan ra Sakîne Guvene zî va ‘tecrîd zulmêko gird o’ û wina domnaye: “Ma do vera yê ke nê zulmî bi ma danî cuyayîş de sere nêronî. Wa Erdogan û dewleta tirk sebrê ma reyde kay nêkerî, şarê kurd vera înan de sere nêronenî. Eke Rayberîya ma nêba, çi aştî beno û çi zî gonî vindena. Ma seba ke Rayberîya xo ra xebere nêgênî, etirîyenî û ma nêzanî çi ameyo sereyê Rayberîya ma ser de. Ganî bi hawayo rew derheqê rewşa Rayberîye de îzehet bidîyo û pêvînayîşî bêrî viraştiş.”
Nêşênî şarê Kurdî
Dayîkan ra Emîne Erbeke zî va ‘rejîmê Erdogan û AKPyî hewl dano bi rayîrê tersî tecrîdî bi şarê kurd bidî qebulkerdiş’ û wina dewam kerde: “Ez veng dana heme şarî ke wa vera tecrîdî bivejyî raşteyan. Şarê kurd bi rayîrê tersî Rayberîya xo ra fek veranêdano. Erdogan û dewleta tirk bi domnayîşê tecrîdî peynîya xo anî.”
Dayîkan ra Guler Bugdaye zî dîyar kerde ke tecrîd bi hawayo dişmenî yeno meşnayîş û wina va: “Vera nêyî de HDP û sazî û dezgehê bînî se kenî û mîyanê prosesêko senîn de yî. Ganî sazî û dezgehê ke eşkenî şarî rê rayberî bikerî, bikewî mîyanê têgerayîşî û tayê çîyan bikerî. Tecrîdo ke Rayber Apoyî ser de yeno meşnayîş, tena seba şarê kurdî nê, seba tirk û şaranê bînan zî netîceyê ci giran beno. Cok ra ganî heme şar û temsîlkarê înan vera tecrîdî de biwerzîy lingan ser û HDP zî nê prosesî rê rayberî bikero. Şarê kurd seba Rayberîya xo amade yo ke her tewir bedelan bido û têkoşînê xo berz bikero.”
ANF/STENBOL