Canşer Amanos: Ma dekewnî serrgêra 18’in a komploya mîyanneteweyî. Na komplo şexsê Rayberîye de erjê şarî û xeta azadîye ra ameyo kerdiş. Hêzê ke viraştişê komploye de ca girewtî goreyê menfîetê xo yê Rojhelato Mîyanênî ca girewtî. Rayna ma zanî ke rolê hemkarîyeya kurdan zî bîyîşê komploye de esto. Sereyê de Rayber Apo û xoverdayîşê ke hetê heme şarî ra ameyo nîşandayîş, komploye veng veto. Îspatê ci yê tewr gird zî Şorişê Rojawanî yo. Beşdarbîyîşê ciwanan a xoverdayîşê Şengalî zî no nîşanê ma dano. Xoverdayîşê ke eyro Vakurî de yeno nîşandayîş, verdewamîya no xetî ya.
Alî Zagros: Komploya Mîyanneteweyî şexsê Rayber Apoyî de erjê heme merdimîye ra ameyo kerdiş û sereyê de Rayberîye û badê zî heme şar bi xoverdayîşê xo dijî nê hêrişî vindetî. Hêzê hegemonîk bi komploye waştî ke Tevgera Kurdan yesîr bigîrî la nêşînayî biresî hedefê xo. Komplo tepa agêray ser hêzê ke komplo viraştî ser o. Şarê kurd dijî komploye çar parçeyê Kurdistanî de wariştî lingan ser û beşdarê gerîla bî û bi no hawa verpersa komplo dayî. Sey mîlîtanê Apocî çîyo ke keweno ser milê ma pratîkkerdişê paradîgmaya Rayberî yo. Ewro wexto ke ma xoverdayîşê Rayber û şarî ewnîyenî, ma fam kenî ke komplo encam nêgirewto.
Helgurt Çewlig: Yesîrbîyayîşê Rayber Apo tena yesîrbîyayîşê fîzîkî û tena şexsê ci ra nêameyo kerdiş, komploya mîyanneteweyî heme şarê şorişgerî ra ameyo kerdiş. Rayber Apo û şarê kurd qet teslîm nêbîyo û xoverdayîşê ke eyro yenî nîşandayîş zî na raştî nawneno. Her çend ke Rayber Apo hetê fîzîkî de yesîr bîyo zî hetê felsefe, fikr û vîrdozî de yesîr nêbîyo. Rayberîye dijî modernîteya kapîtalîstî paradîgmaya ke pergalî serobin kerdo, aver berdo. Ma do serra 2016’î bikî serra azadîya Rayber Apoyî.
Zamanî Garzan: Komploya ke dijî rayberê ma de ameyo kerdiş bi destê zihnîyetê dewletperest yê 5 hezar serrî ameya kerdiş. Felsefe û paradîgmaya Rayberîye seba wedarnayîşê îqtîdarî newe ra ganîkerdişê erjê komelê xozayî bî. Ma zî sey fedaîyê Rayberîye dijî yesîrbîyayîşê Rayberîye, fikr û bawerîyanê Rayberîye danî cuyayîş û dekenî pratîkî. Dewlet zî her roj hêrişanê xo domnena û wazena ma çinî bikera. La bi nê hêrişan heta nika qet encam nêgirewto û nika ra pey zî do encam nêgiro.
ANF/BEHDÎNAN