‘Platformê Vindernayişê Cînayetanê Cenîyan’ zî bi Komîteyanê 25ê Mijdarî xo keno hadre ke xoverdayişî berz bikero. Seba nûmayişan plansazî hadre yê.
Temsîlkara Platformî Gulsum Kav ke derheqê hadreyînanê 25ê Mijdarî de qisey kerd vist vîrî ke iyê dê dûştê xespkerdişê heqan û seba tekoşînê azadî meydanan de bê. Kav aşkere kerd ke yê ke şîdetê vera cenîyan rewa kenê û dişmenîya cenîyan kenê xorîn, iyê dê dûştê înan tekoşînê laîktî û azadî berz bikerê.
Komîteyê 25ê Mijdarî
Gulsum Kav da zonayen ke seba ke şîdet her ke şina bena vêşêr zey Platformî înan komîteyê 25ê Mijdarî ronayê. Kav vist vîrî ke Tirkîye de xespkerdişê ciwîyayişê heqanê cenîyan her ke şino beno jêde û va, dûştê nayî de ma waşt ke xoverdayişeke hera damûsnê.
Kav da zonayen ke seba 25ê Mijdarî înan kombîyayişê sifteyîn 19ê Cotmeng de viraşto û aşkere kerd ke ebe pêrokîn rêxistinanê cenîyan înan yekîneyê ortex viraştîye. Temsîlkara ‘Platformê Vindernayişê Cînayetanê Cenîyan’ Gulsum Kav da zonayen ke 25ê Mijdarî de iyê dê bi nûmayişanê ortex meydanan de bê û wina dewam kerd: “27ê Mijdarî de zî zey Platformî ma dê nûmayişanê xo virazê. OHAL tewr vêşî zî cenîyan tesîr keno, nayî ra ganî tewr vêşêr zî cenî bivejyê meydanan. Şîdet û kiştişê cenîyan bi jêde. Seba ke ma wayîrê nê meseleyan benê, îxtidar cenîyan kena hedef. Dezgehê cenîyan yenê giroten.”
Cenî dê bêveng nêbê
Kav aşkere kerd ke se beno wa bibo cenî dê bêveng nêbê û va, vera na bêedaletî ma dê veng û tekoşîna xo berz bikerê. Kav hayr ant hera bîyayişê herbî ser û vist vîrî ke polîtîkayê herbî tewr vêşêr zî cenîyan tesîr kenê. Kav da zonayen ke rejîmê nikayî tim û tim cenîyan hedef gêno. Aktivîsta Platformî dîyar kerd ke Tirkîye de nefretê vera cenîyan reyna ganî beno û veng da cenîyan; û va, ‘çîyo ke ma bixelesno tekoşîn o.’
Kav tewr peynî de aşkere kerd ke cenî tenya nîye û va, eke cenî sereberz vinderê dê serbikewê.
DÎHABER / ENQERA