Badê ke bi Qerarnameyê Hukmê Qanûnîyan (KHK) televîzyonî ameybî padayîş, nika zî kel-melê nê televîzyonan yenî rotiş.
Babete ser o îdarekarê nê televîzyonan reaksîyon nîşan dayî. Koordînatorê Pêroyî yê ÎMC TVyî Eyup Burç û Serekê Heyetê Îdareyî yê TV 10î Velî Buyukşahînî qisey kerdî û reaksîyon nîşan dayî.
Buyukşahînî va ‘herînayîşê kanalê televîzyonêkî bi mîlyonan reseno, labelê bi pereyêko ercan roşîyeno hetgiran’ û wina dewam kerd: “Dezgeyo ke elewîyan bi loqme û keda xo awan kerdbî, nika pêşkêşê hetgiranê xo kenî. Bi no hawa sazîyê ke problem û lazimîyanê şarî esas gênî, yenî padayîş û hetgiranê xo rê ca akenî. Nika ma mîyanê sîstemo ke elewî, kedkar, cinî û heme bindestan çinî hesibneno de cuyenî.”
Mantixê engîzîsyonî esto
Burçî zî va ‘ewro eşyayê ÎMCyî ke yenî rotiş, aydê JAN Produksîyonî yî’ û wina domna: “Qerare rotişî skandal o. No seba dewlete çîyêko zaf eyb o. Skandalêko bîn zî eşyayê ke aydê Reutersî yî zî yenî rotiş. Nê eşyayan nêşenî biroşî. Çimkî doza ÎMCyî dewam kena. Ewro Mehkemeya Heqê Merdiman ya Ewropa (AÎHM) bi mehneya Komîsyonê OHALî abîyo, muracatan tepîya erşawena. No zî bî sebeb ke mexdurîyetî zêde bibî. Ewro mantixê engîzîsyonî esto.”
ANF/STENBOL