KENAN KIRKAYA / MA / ANQARA
Nizdîyê 3 serrî yo ke Rayberê Şarê Kurdî Abdullah Ocalanî ra ti xebere nîna girewtene û na rewşe kurdan etirnena. Kurdî vera tecrîd û îzolasyonî de bireaksîyon î. Parlamenterê HDPyî yê Riha Omer Ocalan derheqê tecrîdo ke Rayberê Şarê Kurd Abdullah Ocalanî de qisey kerd.
Ocalanî va ‘Merdim nêşêno tecrîdo ke vera Ocalanî de yeno domnayene, sey tecrîdo ke vera kesêkî de yeno domnayene bivîno’ û wina domna: “Raştîya xo de tecrîd vera heme komelî de yeno domnayene. Eke ma azadî û demokratîkbîyayîşê nê welatî wazenî, ganî ma vera tecrîdî de bivinderî. Roja ke tecrîd dest pêkerdo ra nata Tirkîya de heq û azadîye tepîya şîyî. Tirkîya nika ameya kaşî ver. Cok ra kesê ke Tirkîya fikirîyenî, ganî heme vera tecrîdî de têkoşîn bidî.”
Ocalanî qiseykerdişê xo de qala munaqeşeyê îdamî zî kerd û wina va: “Donemo peyên de munaqeşeyê îdamî zaf yenî kerdene. No damêko gird ke hetê îqtîdarî ra ameyo amade kerdene yo. Nika zî hewl danî ser domanan ra reyna bikerî rojeve. Çimkî derde înan îstîsmarkarî nîyî. Xora heta nika xeylê kesê îstîsmarkarî çarçewaya efûyê ke nînan vetî de ameyî veradayene. Ganî ti kes nêro kayanê nînan.”
Ê çiqas hêriş bikerî, ma hende bihêz benî
Ocalanî veng da heme kurdan ke wa wayîrê heqanê xo bivejyî û wina qedêna: “Ma nêşênê yewna seserre vînî bikerî. Eke ma wayîrê azadîyanê xo nêvejyî, ma do heme çîyê xo vînî bikerî. Ê çiqas hêrişê ma bikerî, ma hende bihêz benî. Ma do estena xo bidomnî. Ez do bi hawayo şexsî ser yewîya kurdan de bivindera. Çimkî komelo ke yewîya xo awan nêkero, nêşêno serbikewo.”