Şero mîyanên yê Sûrîye ver yê ke tewr zêde tesîr bîyî, cinî yî. Cinîyê ke şerî ver mecbûr mendî ke welatê xo ra koç bikerî, reyna sîyaseto ke denetîmê camêrdî de yeno kerdiş de vînî benî, nînî dîyayîş.Babete ser o akademîsyena ke vatbî ‘ez nêbena ortaxê nê sucî’ û bi Qerarnameyê Hukmê Qanûnî karî ra amebî îxraçkerdiş, Prof. Dr. Ferîde Aksu Tanike qisey kerde.Tanike va ‘problemê tewr bingeyî yê cinîyê bextwaştoxan nînî çareserkerdiş’ û qiseykerdişê xo wina domnaye: “Mîyanê nê probleman de sifteyîn ewleyî ya. Dima ra miqatebîyayîş û sewbîna problemî yenî. Çi heyf ke bextwaştoxî mîyanê keyeyî de raştê şîdetê cinsî, tacîz û tecawizî yenî. Cinîyê bextwaştoxî wextê koçkerdişî de bazaranê koleyan de yenî rotiş.”
Ti temînatê înan çîn o
Tanike dewamê qiseykerdişê xo de va ‘tena Sûrîye û welatanê Rojhelato Mîyanên de nê, Dîlok de zî tîcaretê cinîyan yeno kerdiş’ û wina dewam kerde: “No het de xeylê zanayîşî resayî ma. Resayîşê nê cinîyan yê xizmetanê weşîyan zî xeylê zehmetin o. Kultur û musayîşê cuye yê merdiman heme raştê travmayêk yenî. Keyeyî parçe benî, ma vînenî ke nimûneyê keyeyê ke pî merdo, domanî vînî bîyî û dayîke tena têkoşînê cuyayîşî dana, estî. Orte de dagîrkerîyêka girde ya kede esta. Merdimî cayanê zaf xirabinan de bi kîrayanê zaf berzan manenî û vera vêşanî de têkoşîn danî.”
Ganî wina nêbo
Tanike hayr ante şert û mercê weşî ser û qiseykerdişê xo wina qedênaye: “Ganî her şert de bextwaştoxan rê bêrî biabîy. Çarçeweya dewleta sosyal de lazimî bi polîtîkayanê winasî esta. Ganî cinîyî bexwaştoxî nêbî babeta nizdîbîyayîşê polîtîkan û problemê înan çareser bibî.”
DÎHABER/STENBOL