Serokwezîrê Tirkiye û temsîlkarê faşîzmî Ahmet Davûtoglu serva desteg girotişê polîtîkayanê xo yê qilêrîn Awrûpa de ro. Davûtoglu serva pediyayinanê bi hikûmeta Merkel roja Îne yeno Almanya.  Kurdan ra piya, qûwetê antîfaşîzm û qûwetê jûbiyena demoktarîk, hadreyînê protestokerdişê Davûtoglu kenê.  TJKE, NAV-DEM û AvEG-Kon venga prodestokerdiş da. 


Tirkiye Kurdan qetil kena 

Hereketê Ceniyanê Kurd yê Awrûpa û Navenda Civaka Demokratîk yê Kurdanê Almanya (NAV-DEM) derheqê na pêdiyayin de damûstayina piyayî da. Damûstayin de vajiya ke, Almanya cesaret dana polîtîkayanê qetlîam yê AKP. Hayr anciya ablûqeya dewlet ya 19 cayanê Kurdistan ser û niya vajiya: “Dewlet hiqûq, exlaq û qaîdeyanê mabênnetewî çinî hesibnena û polîtîkayanê dustê merdimî ramena. Doman, cenî, kal, pîr û gencî werteyê kuçeyan de înfaz kena.  

Damûstayin de polîtîkayê dewleta Almanya zî amey rexne kerdin û wina vajiya: “Dewleta Almanya jû hetî ra vana gerek vera DAIŞ tekoşîn bîro dayen, heta bîn ra paşt dana AKP ya ke desteg dana DAIŞ. TJKE û NAV-DEM veng da Almanya ke, mebo wertaxê polîtîkayanê qilêrhin dewleta Tirkiye û qetlîamanê ke dewleta Tirk ramena vinderno.  Damûstayin de wina veng ame dayen: “Veng danime pêrokîn çormeyanê demokratîk ke,  22ê Çile, roja Îne tewrê mitîngê protestokerdişê piyakariya qilêrîn bibê û vera qetlîamanê dewlet wayrê xoverdayişê Kurdistan bivejiyê. 


AvEG-Kon zî veng da 

Serva protestokerdişê ziyaretê Davûtoglu yê Awrûpa jû vengdayiş zî Konfederasyonê Goçberanê Bindest yê Awrûpa AvEG-Kon ra ame. AvEG-Kon vist vîrî ke, Serokwezîrê hikûmeta AKP Erdoganî ke desteg dana DAIŞ û bi seyan sivîlan kuçeyan de qetilkena yeno Berlîn. 


Temsîlkarê faşîzmî nêwazeme

AvEG-Kon hayr ant kiştişê ceniyan û sivîlan ser û va, ma temsîlkarê faşîzmî Davûtoglu ke ceniyan, rojnamegeran, şoreşgeran, hiqûqzanan, hunermendan û akademîsyenan kişeno, erzeno zere û îşkence keno Awrûpa de nêwazeme.  AvEG-Kon va ma zey welatijê Tirkiyeyî û Kurdistanî temsîlkarê faşîzmî rê vanê ‘Awrûpa ra def bi’! 


Merkel piyakara sûcî ya 

Damûstayin de vajiya ke, Merkel û hikûmeta ci, ke bi Davûtoglû pêdiyena, bena piyakarê sûcê binlingkerdişê heqan û qetlîaman û wina vajiya: “Merkel weçînayinanê 1ê Mijdarî de zî paşt da dîktatoriya faşîzmê Tirkiye. Netîceyê na bazariya bi paştdayoxê DAIŞ ebi qetlîamê verra hemwelatijanê Alman ageyra.  

AvEG-Kon va, ser bazariya penaberan desteg dayişê newî serva dewleta Tirk, do merdişanê newî xo ra biyaro. Ma na piyakariya dewleta Almannya protesto kenê û veng danime ke wa rotişê tifingan serva dewleta Tirk biqedîno, eleqeyê xo yê siyasî, eskerî û ekonomîk bibirno. AvEG-Kon zî peynî de veng da qûwetanê antîfaşîst ke, tewrê nûmayişê protestoyî bibê. ABDEM û jûbiyena qûwetê demokratîk zî tewrê nûmayişê protestoyî benê.

Nûmayişê protestoyî 22ê Çile, seat 11.00î de, adresê Willy-Brandt Str.1 de dest keno ci.  


 ANF/BERLÎN