Zimistanî wexto ke vewra koyan helîyena, bi ronayîşê şitilê tutinî zîretê tutinî dest pêkeno. Dima ra şitilî pîl benî û hamnanî netîceyê kedêka girde de aşma tebaxe de nîmeyê şewe de yenî arêdayîş. Bi no hawa keyeyî heme debara xo tutinî reyde kenî.
Babete ser o welatîyê ke zîretê tutinî reyde eleqeder benî, qisey kerdî.
Welatîyan ra Kemal Çaglayanî va ‘sey heme mehsulan tutin de zî kesê ke mabênkarîye kenî, zaf pere qezenç kenî’ û wina dewam kerd: “Goreyê xeberê ke çapemenîye de vejîyenî, emser seba tutinî eleqe kêmî bîyo. Eke mudaxaleyêk nêro kerdiş, o wext do Semsûr de betalî zêde biba û merdimî mexdur bibîy.”
Babete ser o kesê ke debara xo bi tutinî kenî, qisey kerdî.
Fadîme Çalgane dîyar kerde ke ê heme debara xo tutinî reyde kenî û wina domnaye: “Eke tutin nêbo ma do zaf zehmetîyan biancî. Ma emser mecbûr mendî ke çimeyanê awe yê neweyan bivînî. Cok ra ma mexdur bîyî.”
Tena debara ma tutin o
Abuzer Çalganî zî va ‘ez domanîya xo ra nata karê tutinî kena’ û wina dewam kerd: “Eke tutin bêro qedexekerdiş yan zî astengîyêk bêro vetiş, o wext ma mecbûr manenî ke keyeyanê xo biteriknîy.”
Gazî Çalgano ke 4 domananê xo bi tutin miqate keno, wina va: “Vatişê ke demo peyên de seba tutinî yenî vatiş, ma dekenî zehmetîyan mîyan. Eke tutin bêro qedexekerdiş, do bi hezaran keyeyî mexdûr bibîy.”
Şehrîban Erturke zî daye zanayîş ke tena çimeyê debara herême tutin o û wina va: “7 serreyî ra heta 70 serreyî her kes tutinî reyde eleqeder beno. Cok ra ganî destê xo ti ra biancî.”
MUSTAFA YUKSEL / SEMSÛR / PÎRHA