Tirkîya çend rojî verê hêrişê Şengalî kerdbî û hêrişan ra dima xeylê kesî reaksîyon nîşanê Tirkîya û PDKyî dayî.
Babete ser o Îdarekarê Yewîya Welatperwerî ya Kurdistanî (YNK) Adil Muradî qisey kerd û dîyar kerd ke vîşêrê PDKyî heme kes û welatî vera Tirkîya de yî.
Muradî qiseykeridşê xo de va ‘PDK erj nêdano şarê xo, dano Tirkîya’ û wina dewam kerd: “Cok ra şar na rewşe ver eciz o. Başûrê Kurdistanî de 19 hebî cayê leşkerî yê Tirkîya estî. Zaxo û dormeyê ci bîyo sey cayê leşkerî yê Tirkîya. Her roje Qendîl û herême yenê bombekerdiş. Êzidîyê Şengalî kurd î. Serra 2014 de 10 hezarî leşkerê PDKyî estbîy, la heme remayî. Şengal teslîmê çeteyanê DAIŞî ame kerdiş. La PKK cinî, doman û şarê Rojawanî xelisna.”
PDK nêewtaneno vengê xo bikero
Muradî tewr peynî wina va: “Eke PKK û YNKyî ra nêbîyêne do Mexmur û Hewlêr zî destê ma ra bişîyêne. Barzanî bi xo şîbî zîyaretê gerîlayê PKKyîyan û spasîya xo înan rê kerdbî. Barzanî nika bi kamcîn rî û heqî vano tîya ra bivejîyê? Hêrişanê peyênan de 20 peşmergeyî merdî. PDK wazeno ke bikero milê PKKyî ser de.Pereyo ke PDK tîcaretê Tirkîya ra gêno şono kura, ti kes nêzano. Mîyanê 3 serran de qasê 93 mîlyar dolarî mazot Tirkîya rê ameyo rotiş. Tirkîya seba qetilkerdişê kurdan çeteyan resna û wazena ke Şengal de cayê leşkerî biviraza. Tirkîya de pere esto; cok ra PDK nêewtaneno vengê xo bikero. Heme qanûnî ameyî çinkerdiş.”
ANF/BRUKSEL