Gerîlaya YJA-Starî Edessa Cejnaya ke nizdîyê 15 serran herêma Dêrsimî de wezîfe kerde, vera hedef û operasyonanê dewleta tirkî de qisey kerde û fikrê xo arde ziwan. 

Gerîla Cejnaye dîyar kerde ke dewleta tirk bi operasyonê îmhakerdiş û şerê psîkolojîk wazeno têkilîya şar û gerîlayî biqerfno û potansîyelê Dêrsimî orte ra wedarno û wina dewam kerde: “Ganî vera nê waştişî de ewja de ma tena ko û gerîla reyde sînordar nêmanî, şarî reyde tedbîrê pawitişê cewherî bêrî awankerdiş.  

Gerîla Cejnaye bale ante muhîmîya Dêrsimî ya seba tevgerê şorişgeran ser û wina va: “Dêrsimî tim waşto ke xo bi nasnameyê elewîtî bipawo û no zî seba netewdewleta tirkî bîyo tehdît. Dêrsim warêko tim paradîgma û têkoşînê ma pawito û hetê bawerî, kultur û ziwan de tim cîyayîyan mîyanê xo de hewênayo. Dêrsim bi bawerî û cografyaya xo tim xoverdayîş de bîyo dîyarker. Hetta merdim eşkeno vajo ke mîtolojî, muzîk û lorîka Dêrsimî daxî enstrumanê pawitişê cewherî yî.”

Heta ewro nêqedîyayo 

“Cejnaye va ‘serranê 90î ra ver û 90î ra dima nizdîbîyayîş û beşdarbîyayîşê şarî yê PKKyî yewbînan ra cîya yo’ û wina dewam kerde: “Serranê 90î de beşdarbîyayîş hîna zêde bî. Beno ke peyser antişê 99î vengîyêk viraşt. Çimkî dewlete bi hawayo ‘ti halê xo de bimane, ez qarişê to nêbena, labelê ti zî PKKyî ra dûrî bivindere’ nizdîyê şarî bîyêne. Potansîyelê Dêrsimî heta roja ma qet nêqedîyayo, labelê polîtîkaya dewlete zî dewam kena. Seba ke ciwanî beşdarê PKKyî nêbî, vera înan dîyena fuhûş û tiryakî. Dêrsim de seba cinîye rê ‘xora ti azad a, lazim nîyo ti bikewa mîyanê gêrayîşêko cîya’ yeno vatiş. Goreyê mi cewabê ke vera nê vatişî de estî, kêmî yî.”

Gêrayîşê azadîya komelkî 

Cejnaye qala ‘cinî do senî vera nê nizdîbîyayîşî de vindero’ zî kerde û wina domnaye: “Dêrsim de raştîya ke cinîye neheqî û zextan qebul nêkerda û vera înan de xo kaş û zinaran ra eşta war, esta. No potansîyel şexsê Embaze Sara de awanbîyayîşê PKKyî ra heta ewro tim esto. Xebatê ma yê cinîyan hîna hîra bîyî û eke ma bişînbî nê xebatan vilayê heme cayan bikerî, ma eşkenî netîce bigirî. Ma eşkenî cemxaneyan bikerî cayê perwerdeyê cinîyan. Ganî herinda gêrayîşê azadîya şexsî ra zêdeyêr, gêrayîşê azadîya komelkî bibo. Wazenî kesê ke xo azad vînenî, kulturê xo ra dûrî yî, koç kerdî û bi welatê xo reyde nêbîyî yewe awan bikerî.”

Sara nimûneya 

Cejnaye bale ante operasyonê ke Dêrsim de virazîyenî ser û wina va: “Dişmenî fam kerd ke gerîla do tena koyan reyde sînordar nêmano û bikewo mîyanê bajarî zî û no tersêko gird ey ci de viraşt. Dewlete hêzê xo vera kesanê bêsîlehan de bixebetna, o bêehlaqîya dişmenî nîşan dano. Embaz Çîyagerî vatbî ‘Ma bi 60 kesan vera artêşa tirkî ke hêzê 4. yê dinya ya de xover da û ma înan têk berd’. Na zaf muhîm a. Ewja de girêdayîya felsefe û bawerîya ke Rayberîye awan kerdî, estî. Dişmen nêyî ra terseno. Tena yew kilaya adirî lazim a; eke na kila biba, peynîya na kila zî yena. Bingeyê na kilaye esta; têkoşînê Embaza Sara nimûneya na ya.”

Ganî her kes xo bipawo

Cejnaye peynîya qiseykerdişê xo de va ‘têkoşînê ma 2 esasan pê yeno’ û wina qedênaye: “Yew bi têkoşînê sîlehî pawitişê ziwan, kultur û cografyaya xo, ya dîyine zî pawitişê îdeolojîk yan zî têkoşînê îdeolojîk. Ganî her cinî û camêrdê ke eşkenî têkoşîn bidî vera xo bidî koyan. Tena merdim xo bierzo pey koyan nêbeno. Ganî her kes keye, taxe û ziqaqê xo de xo bipawo. Ganî şarê Dêrsimî hetê komelkî de zî xo vera dewlete de bikero sîleh.”


ZINARÎN CÛDÎ / ANF / BEHDÎNAN