Vera tecrîda ser Rayverê Şarê Kurd Abdullah Ocalan’î hêrs û nêrazîbîyayîşî her ke şinê benê berz. Tepişteyê dawa PKK û PAJK zî seba wedarnayîşê tecrîdî û waştena Ocalanî destpa grevê veyşanî kenê. Nûmayişo mavêna 15'ê Adare û 15'ê Nîsane bi rengê vurîyayîş do virazîyo de, îxlalkerdişê heqanê tepişteyan zî dê protesto bibê.
Tepişteyê dawa PKK û PAJK ke girotxaneyanê Tirkîye de bin zext û zorvajîyan de manenê, derheqê rewşa Ocalanî de îzahatêke day.
Îzahato ke ser nameyê tepişteyan hetê Deniz Kaya ra amê dayen de hayr ancîya şert û mercê giran yê Rayverê Şarê Kurd Abdullah Ocalan’î ser. Kayayî vist vîrî ke seba ke tecrîdo giran ke vera Ocalanî yeno ramiten biqedîyo û şertê serbestîya ci bîrê ronayen, zey tepişteyê dawa PKK û PAJK ê destpa grevê veyşanî yê vurîyayîşî kenê.
Tecrîd û îzolasyon vila beno
Denîz Kaya’yî ard ziwan ke nûmayîşê înan do aşmeke dewam bikero û wina va: “Îxtîdara AKP 15'ê Temmuze ra dima, Tirkîye de OHAL îlan kerdo û pêrokîn Tirkîye bi rejîmê OHAL’î îdare kena. Kerdenê rejîma OHAL’î zîndanê Îmrali de zî ca yenê. Tecrîd û îzolasyona ke Rayverê Şarê Kurd Birêz Abdullah Ocalan’î ser o yena ramiten, gam bi gam pêrokîn zîndananê bînî de vila bena. Zîndanan de tîvarî (ewleyî) û garantîya weşîya ti kesî çin a. Her roj girotxaneyekê sirgunê girotxaneyeke bîn kenê. Kewtişê girotxaneyan de tepişteyan bi zorî viran kenê û ser înan de geyrayîşî kenê. Tepiştey dekewtiş û vetişê girotxaneyan de raştê îşkence yenê. Erzenê ser odeyan û pêrokîn amûranê tepişteyan desteser kenê. Kerdenê vera tepişteyan wextê 12ê Êlulê ravêrna.”
Vengdayîşê malbatan
Kaya, veng da malbatanê tepişteyan ke vera îtîfaqa AKP-MHP ya referandumî de vengê "Nê” berz bikerî û paştîdayîşa xo ya têkoşînî xort bikerî.
Greva veyşanî ke Şakran de 15ê Sibate de destpa kerd zî ramena. Nûmayîşî ra dima, ser tepişteyan zext û zorvajî bî jêde. Şikran ra dima xêlê girotxaneyan de grevê vêşanî ame destpakerdiş.
NAVENDÊ XEBERAN