24 û 25ê kanûne de Mudura Berpirsîyar ya Ajansê ETHA Derya Okatane, Mudurê Ajansê DÎHAya ke ameye padayîş Omer Çelîk û muxabîrê DÎHA Metîn Yoksu, edîtorê Ajansê Dîkenî Tunca Ogreten, xebatkarê Bîrgunî Mahîr Kanaat û Mudurê Karê Nuşteyan yê Rojnameyê Yolculukî Eray Saygin ameybî tepiştiş û hîna zî Mudurîya Asayîşî ya Stenbolî de yenî vindarnayîş.
Avûkatê Buroya Huqûqî ya Bindestan Sezîn Uçaro ke 2 rojî verê muwekîla xo Okatane reyde pêvînayîş kerdbî, babete ser o qisey kerd.
Uçarî va ’13 rojî yo ke muwekîlê ma tepişte yî û derheqê sucdarkerdişî de çi ma rê û çi zî muwekîlanê ma rê çîyêk nêameyo vatiş’ û qiseykerdişê xo wina domna: “Ma waşt ke dozgero ke tehqîqet dayo destpêkerdiş reyde pêvînayîş bikerî, la dozgerî waştişê ma red kerd.”
No cezakerdiş o
Uçarî dewamê qiseykerdişê xo de va ‘Nika derheqê tehqîqatî de çîyêk nîno kerdiş’ û wina dewam kerd: “Hîna îfadeyê muwekîlanê ma daxî nêgirewtî û bi hawayo aşkere yeno dîyayîş ke tepiştişê muwekîlanê ma daxî cezakerdiş o. No cigêrayîşkerdişê delîlan nîyo, cezakerdiş û îşkence yo. No zî sey demêko derg tewqîfmende maneno. Muwekîla mi Okatan dest bi grevê vêşanî kerdo. Muwekîla mi her roje kontrolê weşî ra derbaz bena û vîtamînê B1 gêna. Şert û mercê ke tede yî, baş nîyî; cayêko teng de 5 cinîyî manenî.”
Mesajê Okatane
Uçarî qiseykerdişê xo de bale ant mesajo ke Okatane erşawito û va muwekîla ci wina vato: “12 rojî yo ke ma nêzanî bi çi yenî sucdarkerdiş, tepişte yî. Ma pey heme kerdişanê xo de yî. Resnayîşê raştîyan yê seba şarî berpirsîyarîya ma ya. Yê ke suc keno, îqtîdarê AKP yo, Berat Albayrak o. Nika ganî ma teber de bîyêne û raştîyan biresnayêne şarî. Netîce se beno wa bibo, ma do resnayîşê raştîyan ra fek veranêdî.”
Heto bîn ra muracato ke avûkat Ozcan Kiliçî seba Çelîk û Yoksuyî kerdbî, hîna ti cewab nêameyo dayîş. Îtîrazo ke seba Kanaatî amebî kerdiş zî ameyo redkerdiş.
ARZU DEMÎR / ANF / STENBOL