Ablûqe û xoverdayişê şarî
Qezayê Amed Sûr de ‘qedexe’ yê vetişê teber û ablûqe yê dewlet roja 27. de rameno. Verra polîtîkayanê qirkerdin xoverdayişê şarî rameno. Cizîr û Sîlopya de zî ‘qedexe’ yê dewlet kewt roja 15în. Verra ‘qedexe’ yê dewlet Botanijî ser payanê. Qezayê Mêrdîn Kerboran de zî ablûqe roja 18. de ya. Çarçoveyê ‘qedexe’ de êrişê dewlet ramenê. Çeteyê AKP yê ke nêşayî dekewê mehleyan, serva goçkerdişê welatijan êrişanê xo kerdî jêde. Verra êrişan welatijî çarçoveyê xopawitenê cewherî de xover danê. Nisêbîn de zî, çi que, qedexe hewadiyayo zî, la ablûqe ya dewlet ramena.
Verra ablûqe û êrişanê dewlet nûmayişê protestoyî yê kurdan û çormeyanê demokratîk ramenê. Roja Şemî û Yewşem, Sêwereg ra heta Çewlig, Mersin ra heta Edena nûmayişê protestoyî viraziyay.
Çewlig de KJA ra nûmayiş
Çewlig de bi rayverîna KJA rayşiyîn viraziya. Parlamenterê HDP yê Çewlig Hişyar Ozsoy û wendekaranê sûk ra piya xeylê kes tewrê nûmayiş bî. Welatijê ke ver bana HDP ra heta kuçeyê Beşyol raşyî. Nûmayişkaran dowîzê “kiştox dewlet do hesab bido” hewaday û sloganê zey “Bicuwe xoverdayişê kurdistan” berz kerdî. Nûmayiş de hayr anciya êrişanê dewlet ser.
Sêweregijî meydanan de bî
Qezayê Riha Sêwereg de zî êriş û ablûqe yê dewlet protesto bî. Welatijê ke Parqa Kanlikuyu de amey pêhet, panqartê “Wa merdişî nêbê, tifingî bêveg bê, muzakereyî destpa bikerê” akerdî. Nûmayişa ke hetê HDP û DBP viraziya de êrişê dewlet yê verra cayanê xorayverîn benê protesto bî.
Ser nameyê nûmayişkaran hemserokhe rêxistina DBP yê qeza Îbrahîm Ayyildiz’î damûstayîn da. Ayyildiz’î hayr ant tecrîdê verra Rayverê Şarê Kurd Abdullah Ocalan’î û xoverdayişê Sûr, Cizîr, Sîlopî, Kerboran û Nisêbîn ser. Ayyildiz’î veng da kurdistanijan û va, “veriya ke berey nêbo, qandê-serva ronayişê cuwyana azad bibime jû.” Nûmayiş de sloganê zey “bicuwe Serok Apo”, “Bicuwe xoverdayişê Cizîr” û “Kurdistan do faşîzmî rê bibo mezel” berz bî.
Kiştoxan silasneme
Mersin de azayanê DEV-LİS parqa domanê azad de nûmayiş viraşt. Wendekarî pey panqartê “verra herbê seray gune çiyê bîro kerdin” ray şî.
Nûmamiş de sloganê “Cizîr tenya niya”, “Herbî rê nê” berz bî. Ser nameyê nûmayişkaran azaya DEV-LİS Helîn Ertekîn qisey kerd û hayr ant qetilkerdinê qeçik-domanan ser. Ertekîn va, vizêr Ûgûr Kaymaz, Ceylan Onkol, Berkîn Elvan, ewro Mehmet, Mete, pitika Meral. Kiştoxan silasneme.
Verra teror û êrişanê dewlet Merdîn, Şirnex, Colemerg, Wan, qezayê Mersîn Tarsûs, Edena, Îzmîr û xeylê sûkanê kurdistan, tirkiye û teberê welatî de nûmayişê protestoyî viraziyay.
NAVENDÊ XEBERAN