Qoricîyê ke welatijan ser o zext û zorvajî ramenê 6 wesayîtan xesp kerdî. Herzewbîn qoricîyê bi tifingî ke kewtî qeza, welatijan bi vatenanê “Neyra tepya şima dê bivînê, ma dê Licêyijan rê se bikerê?” tehdîd kerdî.
Roja verî ser raya Licê-Pasûr de verra wesayîta qoricîyan hêriş virazîya û di qoricî merdî û 1 çawişê pispor ra pîya 4 qoricî zî bî dirbetin. Goreyê îdiayan nê qoricî rîwalo ke tewrê operasyonê lejkerî yê dewleta tirk ke qezayanê Amed de rojanê peynî de ame ramiten bîyê, bî hedef.
Bi tifingan tehdîd kerdî
Na bîyayiş ra dima xêlê qoricî kewtî dewa Şêxan û hêrişê welatijan kerdî. Qoricîyan welatijê bi nameyê Kerîm Perçîn derb kerd û girotî bin çiman. Herzewbîn qoriciyan deweka Xencer de zî di gurekarê DEDAŞ û mixtarê dew derb kerdî. Gurekarê DEDAŞ yê bi nameyê Erdal Bayhan û Ahmet Kozak ke hewadiyay nêweşxane, badê tedawî taburcî bî. Qoricîyan dest nay ser teqsîya bazirganî û 4 wesayîtê sivîlî ser o.
Qoricîyê ke Licê de teror ramenê vizêr şodir ra tepya bi tifingan, bi vatenanê “Neyra tepya şima dê bivînê, ma dê Licêyijan rê se bikerê?” welatijan tehdîd kerdî.
DÎHA / AMED