Ez na nameye to rê zaf dûran ra nusnena. La ez bi omîda ke rojêk nêbo rojêk ti na nameya mi cayêk de rastê ci bêrê û biwanê.
Ti! Ti maya mi (wendîşê to çîn o la yew to rê biwano do ti fam bikerê. Bi ziwanê to nusnena), pîyê mi, birayê min o pîl, birayê min o qic, waya min a pîl e, waya min a qic e. Werezaya mi, birazayê mi, embazê mi, ya kî waştîyê mi… Mi heşna ke ti bi ziwanê ma qiseykerdîşî qic vînena. Yê ke bi ziwanê ma qisey kenê ti înan ra vana dewij. (Leyê mi de dewijî cayê sereberziyo, la ez zanena ti maneyê qickekîye de, peydemendîşî de vana). Ez to rê se vajî. Ez do nê halê to senî tarîf bikerî. Çi nameyî binî pa. Nêzanen…
Çi taw însanî nîya bikerê (xora dagirkerî her tim nîya kenê) beqî ênê vîra mi. Tirkî de ci ra vatenê “Başkalaşim”. Yanê teşevurîyayîş. Rind nêno vîra mi ya mektebê verênî de ya kî mîyanênî de musnaybî ma. Beqî tawo ke hakî ra vecînê manenê masîya. Peyê cû teşe vurnenê manêne beqan. Nê ra vajîyêne, teşevurîyayîş. Her hal çîyo ke înan serê ma de waştênê bivirazê no bî ke na çekuye û çîyê ke na çekuye aqlê mi û hîsanê mi de viraşte qet vîra mi ra nêşonê û hona kî tawo ke an xo vîrî heman çiyan hîs kena. Seba beqe bê şik ez çîyê nevanena, la tawo ke seba însana bî mi de hestê vîndîbîyayîşî virazeno, vengîya zereyê mi keno xorîn û hîra. Neheqî û zordarîye ano vîra mi. Dara zorê ano vîra mi. Çira? Çira tayê hende cad kenê ke tayena bimanênê xo ra? Wa her kes xo bo nêbeno? Ez zaf merex kena gelo mîyane tu heywanan de ya kî mîyanê tu gandaran de çîyode nîyanên esto? Mavajîme, mar merî ra vano bibe mar, ya kî gule vile re vana bibe gule. Seba ke mere bibo mar, mar zulm û zordariye keno serê merî de ya kî gule serê vile de…
No çîyê nîyo nê ra xirabêr, însan xo ra şerm bikero. Kameya xo ra şerm bikero. Ziwano ke pê bîyo pîl, ziwano ke hîna dayika însanî tebere ey ziwanî ziwanode bîn mezano û însan ey ziwanî qic bivîno, ci ra şerm bikero, bi ey ziwanî qiseykerdîşî peydemendîş bivîno. Way modern way…Ez do moderniya to biwerî. A moderniya ke ziwanê tirkî ra vêrena ra. A moderniya ke şartê xo bîyena tirk a.
Ti!
Ti kam bena bibe. Wazena kurd be, tirk be, ereb be, fars be, laz be, çerkez be, waya mi be, birayê mi be, wazena waştiyê mi be, kam bena bibe. A moderniya ke ti kewta pey mi re negerek a. Aye ra zernî bivarê kî ez nêzdîyê aye nêbena. Bi ziwanê xo, bi kameya xo, bi xo bî wa werê mi nano ancîlî bo.