Serewedaritişê Kobanê yê 6 û 8ê Teşrîna verêne bi îzehet dayîşê Rayberê Şarê Kurd Abdullah Ocalanî qedîya.
Îzehetê Ocalanî de tespît û perspektîfê muhîmî yê winasî estbî: “Şarê kurd şarêko mazlum o. Şarê Kobanê şarêko mazlum o. Tena mabênê ma de sînorêkî ameyo xêzkerdiş. Şarê Kobanê bi keda xo ewja de yo. Goreyê waştişê xo sîstemêkî awan kerdo. Dewlete tehamulê ci nêkeno. Ganî ci rê destek bibîyênê, labelê nêbenî. Merdimê ma yê ke Kobanê de yî, do heta peynî xover bidî. Kamcîn herêma ke kurdî tede cuyenî û DAIŞî estî, ma do heta peynî xover bidî. Vera DAIŞî de do ti tavîz nêro dayîş. DAIŞ rêxistinêka sûnî yo. Kura de vera kurdan de hêrişêkî bibo, ganî ewja de cewabêko gird bêro dayîş.
DAIŞo ke hetê mîyanneteweyî ra destek gêno, hewl dano kurdan çinî bikero. Heqê ti kesî çin o ke şarêkî çinî bikero. Wa kurdî her ca de sere wedarnî. Ganî kurdî her ca de vera DAIŞî de xover bidî. Eke wina nêkerî do siba erey bibo. Biewnênê çi anî sereyê ma; ma ra tayînan kenî arayî, tayînan kenî werdê mîyanê roje û tayînan zî kenî şamîye. No bi hawayo tesilî nîno qebulkerdiş. Heqê ti kesî çin o Kobanê tena verdo. Ganî vera DAIŞî de her ca de xoverdayîşêko gird bibo. Kobanê heme çîyê ma ya. Prosesê Kobanê seba her kesî yo. Şarê kurd ewja de sey şemsîya yo. Tirkmen, ereb, armenî û şarê bînî eşkenî cuya xo binê na şemsîya de bidomnî.
Hetê ma de çîyêko bîn çin o; çi bikewo milê ma ser ma kenî. Labelê no bi hawayo yew hetî nêbeno. Tirkîya de qanûnî yenî vetiş û vanî wa şarê Mexmurî bêro. O wext no derheq de ti qanûn ameyo vetiş an nê? Nê. Yeno vatiş ke wa şerwanê kurdî bêrî, seba nêyî zî qanûn çin o. O wext kurdî yenî se kenî? Gelo wa bêrî û bikewî zîndan? No nîno qebulkerdiş. Eke biwazî muzakerayan bidî destpêkerdiş, ganî ma mijûl nêkerî. Ganî muzakereyê raştî bêrî kerdiş. Mi waşt ke wa sekreterêkî bidî mi ke ez bişînba waştişanê xo binusa. Labelê nêkerdî. Proses teorî de esto, labelê pratîk de çîyêk nîno kerdiş. Proses wina nêbeno. Eke ma wazenî no proses baş bimeşîyo, ganî ma heme çîyî rê xo amade bikerî. Eke heta 15ê Teşrîna verêne wina nêkerî, o wext goreyê mi proses qedîyayo. Çîyêko ez bikera, çin o. 5 serrî yo wina kenî, labelê netîceyêk çin o. No raşt nîyo.
Reyna ez texmîn kena ke JÎTEM seba ke proses xira bikero, kewto dewre. Eke JÎTEM orte ra nêro wedarnayîş, no proses nêmeşîyeno. JÎTEM orte ra wedarnê ke wa proses bi hawayo demokratîk bimeşîyo. Ma seba heme çîyî amade yî û ma wazenî wa prosesêko raşt bimeşîyo. Ma mijûlkerdiş û taktîkan nêwazenî.”
Serewedaritişê Kobanê 4 serrê xo pey de verda, labelê cayê xo hîna zî vîrê şarî de gêno. No serewedaritiş, hetê nîşandayîşê hêzê ziqaqî nimûneyêka baş o. Tesîrê nê serewedaritişî demêko derg do dewam bikero. Ma kesê ke no proses de şehîd bîyî, înan bi rêze yad kenî.
BRUKSEL