Tilîlîyê cenîyê Cizîrijan sey sîleyeke rîyê dewleta ke waşt sey Koyê Agirî bivajo ‘Kurdistan tîya de definkerde yo’ guna û adirê Newroze hîna zaf berz kerd. Şaro ke raştê qirkerdişê gird ameynê, hetê Berîvana Cizîrij ra govendê xoverdayîşî ra amey dawetkerdiş û Berîvan bi têşanayîşê engîşta xo vana; ‘Ma canê xo zî bidî vera şima sereyê xo çewt nêkenî’.
Berîvan ra heta Mehmedan
Cizîr ke badê tûfanê Nuhî sey ‘Şaristano Cinet’ yeno zanayîş, nika zî sey dîroka xo bi xoverdayîşî dîrokeke newe yeno nuştiş. Şarê Cizîrî dûştê polîs û lejkeranê dewlete ke wazenî Cizîr dagir bikerî ra vanî; ‘Şima nêşkenî ma eşqê azadî ra biqerefnî’ û xover danî.
Berîvane ra dima nika zî Hemserokê Meclîsê Şarî yê Cizîrî Mehmet Tunç bi vatişê ‘Ma xeta Mazlum, Kemal û Xeyrîyan ra yenî. Teslîmîyet seba ma xîyanet o. Wa kes pawitişê teslîmbîyayîşê ma de nêbo’ rayberîya şarê welatperwer ê Cizîrî kerd. Mehmet Tunç o ke heta peynî pey vatişê xo de mend, tewrê kerwanê şehîdanê azadî bi…
Qiseyê peynî yê Mehmet Tûnç’î zey wesiyetê berzkerdişê xoverdayişî bî: “Ma teslîm nêbenê. Bi merdişê se kesan no hereket nêqedîno. Yê ke pey de manenê wa bi ma ra sereberz bê. Zey şarê Cizîr, ma dê vera faşîzma AKP çokê xo nêdê ro. Ma teslîm nêbenê”.
“Çok nêdanime ro“
Cenazeyê Mehmet Tûnç’î vizêr zey jew qehremanê şarî, hetê hezaran kesan amê definkerden. Malbata Tûnç ra piya bi hezaran kes serva oxirkerdişê Mehmet û birayê ci Orhan Tûnç’î vejyay meydanan. Cenazeyê hurdî birayan bi slogananê “Ma çok ro nêda, ma dê ro nêdê“, “Bicuw xoverdayişê Cizîr“ berdî mezelxaneyê Nalaro.
Hemseroka Meclîsê Şar yê Şirnex Umran Yîgît merasîm de qisey kerd va „Embazno, şênî megirê, roj roja şîn girotiş niya, roja xoverdayiş a. Yîgît hayr ant qiseyanê peynî yê Mehmet Tûnç’î ser û sozê domnayişê tekoşînê înan da. Yîgît wina veng da Mehmet Tûnç’î: „Biewnî alwoz Mehmet, wa mijdanî bo ke wesar ame. Ma soz danê ke ma dê tarixo ke şima nuşna rê wayir bivejyê.“
Hemseroka HDP Fîgen Yuksekdag zî merasîm de qisey kerd û aşkere kerd ke ewro roja deyndayişê Mehmedan a. Roja serkewtişê Mehmedan resnayişê serkewtiş a. Yuksekdag va, înan vera wehşetî milê xo çewt nêkerd. Kurdistan bi înan ra serberz o.
Şehîdê pêrokîn Kurdistanî yo
Hemseroka KCD Selma Irmak zî da zonayen ke, hinî dûştê wehşeta dewlet de roja berzkerdişê tekoşîn ameya. Irmak aşkere kerd ke înan wesar ard û teslîmê ma kerd. Irmak va „wa şarê ma bizano ke azadî her wextî ra hona jêde nezdî ya. Wesaro ke înan teslîmê ma kerd, ma bi serkewtiş tacîdar bikerê. Roj roja berzkerdişê tekoşîn a.
Maya Mehmet û Orhan Tûnç’î Esmer Tûnç ke leyê tabûtanê domananê xo ra nêabirniya, aşkere kerd ke Mehmet û Orhan tenya şehîdê mi niyê, şehîdê pêrokîn Kurdistaniyê û herkesî rê serweşî waşt.
Badê qiseyan birayê Tûnç’î bi lorika ‘Hewadê şehîdê mi hewadê“ amey definkerdin.
NAVENDÊ XEBERAN