AKP 12 serrî yo bi zur û polan hukumat dera. Ebi xo dest kena “demê muzakere” eke tenê waxt qezenc kerd, onca no “dem” dana vindarnayene.

Kurdan ra ke teseliya xo gurete, na raye komxebata aleviyan dana virastene. Keyfê xo ke wast û onca waxt qezenc kerd, na gurenayîs kî vindarnena. Na raya verê xo dana asiqan, dest kena komxebatê asiqan. Armancê xo meselan halkerdene niya, hukmê xo ramiten a. Na semed ra jû lizge ra xildana lizgo bîn. Meseleyî kî hen hurênda xo de manenê. Bi na hal teyna muxatabanê xo nê, homete pêro xecelnena. AKP 12 serrî yo bi na tore dewranê xo  ramena.
Mavênê 6 û 8 asma mijdare çalakiyanê Kobanê de raştiya AKP vejiye werte. Nî çalakiyan kerd zelal ke niyetê AKP yê halkerdena mesela kurdî çîna. Zerrê 2 rojî de 45 însanî ameyî kistene. AKP cirm xo ser nêguret, est HDP û hereketê serbestiye yê kurdî ser. Hatta biyayîsan ra Ocalan sermiyan guret. Ti hen zona ke Anqara de AKP serdest niya, HDP û kurdî serdestî yê. Hen zonena ke esker û polîsê dewleta qetilkare binê fermanê kurdan derê. AKP onca nî biyayîsî kerdî mane û vat “binê nî şertan de muzakere nêbena” û nêverda heyetî şerê Îmrali.
Nika onca sermiyanê AKP her roz qesey kenê û vanê “demê muzakere gune devam bikero.” Niya vanê, la onca gaman estene hetê kurdan ra wazenê. Kilmek vanê bêrê teslîm bê! Nînan ra çond numuneyî:
Yardimkarê serokê AKP yê pêroyî Mehmet Alî Şahîn vano: “Nika seweta halkerdena mesela gurenayîs newede dest kerd ci. … Pîtena ma awa ke çekdarêke koyan ra yê, çekanê xo caverdê şerê teverê dugele. Îyê ke wazenê, bêrê teslîm bibê. …” Ha sima rê haştiya dewleta tirkî!
Yardimkara serokê AKP yê pêroyî Oznur Çalik kurdan ra leborine wazena û vana: “Pêro Tirkiye fetelime. Herkes vano “demê halkerdîsî” devam bikero. Tirk kurd ra, kurd tirk ra, alevî sunnî ra, sunnî alevî ra, misliman gayrîmisliman ra, gayrîmisliman misliman ra berz niyê. …” Pekî camî îbadetxaneyî yê, cemxaneyî jê îbadetxane nênê qebul kerdene. Rengê kurdan qedexe yê, kurdî nêşîkînê desmala xo caye darde kerê. Gayrîmislimanî ewro kî binê tehdît derê. Papazêke ameyî kistene, demê serdestiya AKP de ameyî kistene. Hrant Dînk demê AKP de ame kistene. Diyanet Îşlerî teyna seweta sunniyan gureyeno. Kam her roz vano tek, tek, tek… Eskerê tirkî her roz sukanê ma de zirrenê, kilamanê nijadperestiye vanê, tewa nêbeno. Eskerê kurdî reye bi kurmancî jû lawike vanê, desinde dawa bena ra. Ha sima rê birayenya AKP!
  Serokwezîro tirk vano: “Îrada ma seweta halkerdena mesela bi qerarenî devam kena.” Sene îrada sene halkerdena, naye AKPyizan ra qederî kes nêzoneno. Hata ewro kî hona zelal niyo, sene heqê kurdan yenê dayene. Nînan de haştiye nêbena, ecdadê nînan domonê xo werdê.