Tevger zaf çî deyndarê Huseyîn Mahîrî yo

Endamê Konseyê Caardişî yê KCKyî Mûstafa Karasûyî qala Endamê Komîteya Merkezî ya PKKyî Huseyîn Mahîrî kerd. Karasûyî va ‘embaz Huseyîn porê xo ra heta neynûkê xo heme çîyê xo da tevgerî û wina domna: “Embaz Huseyîn Mahîr zaf mutevazî bi. Tevger xeylî çî deyndarê Huseyîn Mahîrî yo.”

Endamê Komîteya Merkezî ya PKKyî Huseyîn Mahîrî 1ê Tebaxa 2012î de Fermandarîya Herêma Botanî de gama ke xebata pratîkî kerdêne, Kato Jîrka de pay mayînî nabi û şehîd bibi. Bi wesîleya serrgêra şehadetê Huseyîn Mahîrî Endamê Konseyê Caardişî yê KCKyî Mûstafa Karasûyî qisey kerd û qala vîrardişê Mahîrî kerde.

Karasûyî vist vîrî ke Huseyîn Mahîr xeylî wezîfeyê muhîmî bica ardê û wina domna: “O endamê Komîteya Merkezî ya PKKyî, Endamê Komîteya Caardişî ya PKKyî û yê Konseyê Leşkerî bi. Mahîrî Fermandarîya Eyaletê Amedî kerde û gama ke şehîd bi fermandarîya Eyaletê Botanî de bi. O verê zî Botan de şer kerdbi, fermandarîya Hêzanê Taybetan kerda, Komîteya Pawitişê Şarî de xebetîya; yanî her wareyê têkoşînî de wezîfe kerdî. Bi şexsîyetê xo ramot ke PKK partî û tevgerêko senîn o. Ez partî mîyan de ê kesan ra yew a ke mi destpêk de Huseyîn Mahîrî şinasna.”

Karasûyî da zanayene ke ey Huseyîn Mahîrî Anqara de nas kerdo, Mahîr a game sempatîzanêk bîyo, la sey kadro xebetîyayo. Karasûyî va ‘Huseyîn Mahîr dimayê 12ê Êlule tewrê tevgerî bîyo’ û wina domna: “Bi rastî rastekênanê partîye ra yew bi, fedaî bi. Embaz Huseyîn Mahîrî xo her hawayî fedayê partî û şarî kerd. Hertim hewl dayêne wezîfeyê xo bi hawayê tewr rindî bica bîyaro. Bi rastî zî embazêko ma yo kedkar bi. Huseyîn Mahîr bi mutewazîtîya xo hetê her kesî ra ameyêne heskerdene.”

Bi israr waşt ke tewrê şerî bibo

Karasûyî dîyar kerd ke Huseyîn Mahîrî hertim waştêne ke xebata tewr girane bikero û wina dewam kerd: “Ma nêwaştêne ê bierşawê Botan. Embazêko kan bi. Emrê ey 50 ra ravêrtibi. Loma ma nêwaştêne ê bierşawê Botan, Amed, Dêrsim. Ma ra waşt ke ma ê bierşawê Dêrsim. Ma ra waşt ke ma ê bierşawê Amed. Peynî de zî seba ke Botan heremêka hîra bîye embazan dir pêkerd û şi Botan. Do bişîyêne Botan, labelê do çewî nêzanayêne ke şino Botan. Şerê serra 2012î şerrêko xeylî giran bi. Îqtîdarê AKPyî serra 2011 de seba tasfîyekerdişê tevgerê azadîye hêrişêko giran kerd. Ci ra modelê Srî Lanka vatêne. Seba tasfîyekerdişê tevgerî hêriş kerd. Ê zî vatêne “Demêko winayên de nêbeno ke ez tîya de bimana. Ganî seba nê tevgerî çîyêk bikerî. Ganî ez tecrubeyê xo wareyê şerî de nîşan bida. Bi nê hawayî şi Botan.”

Ey nasname û şexsîyetê tevgerî xeylî kerd xurt

Karasûyî bale ante herişê demê peyênî yê seba tasfîyejerdişî ser û wina qedêna: “Ma nika zî şer kenê, şehadetî benê. Ganî heme embazê ma, şarê ma, her kes bi tewirê embaz Huseyîn Mahîrî bizano, sey nimûne bivîno. Gama ke dişmen hêrişê giranî keno tewirêko senên eşkeno bêro ramotene? Îradeyêko senîn eşkeno bêro ramotene? Embaz Huseyîn Mahîrî nê pêro ramotî. Ez ci bi hurmet û minet bi vîr ana. Tevger xeylî çî deyndarê ci yo. Ey nasname û şexsîyetê tevgerî xeylî kerd xurt. Ê erc aferna. Tena şer nêkerd yan zî tena rayberî nêkerde. Heman wextî de bi tewir û şexsîyetê xo afernayîşê kulturê PKKyî de rolêko pîl bica ard.”