Endama Koordînasyonê PAJKî Rotînda Amed vat ke kurdan bi xoverodayişê xo şorişî ra şonê û no xoverodayişê heqîqatî kurdistanijan o û nika di Kobanê de bi hetkarîya hêzê kapîtalistan şerê dagirkerdişî averşona.
Amed wina vat: “Verba no dagirkerdişî zî muazzam yew îradeya şarî yena mojnayiş la belê her ke şona hêzê kapîtalistî bi DAIŞî hêrişê xo zaf kenî. Ewro bi no şerî ganî her kes safê xo net bikerê û wa heme dostê kurd û dorûverê demokratîk beyanê îradeyê xo aşkera bikerê û bivejî waran û no îradeyê xo bimojnê. Di no şerê de yew het de şaran yew het de zî hêzê kapîtalist est ê. Xoverodayişê şarê bi dagirkerdişê Şengalî dest pê kerd û nika di zîrveyî de yo. Şaran wazenê bi pergala xo di mîyanê aştî û aramî de biciwî la belê hêzê kapîtalist no waştişê şaran ra rêz nêmojnenê û no ser têkoşîna şaran bi heqî yo.”
WAZENÊ KURDAN QIRBIKERÊ
Amed bal ont ser hîsgêrîya şarê kurd û wina domna: “La belê verba na hîsgêrîya şarê kurd, çeteyê DAIŞî bi hetkarîya hêzê kapîtalist her ke şonê hêrişê xo zaf kenî. Hewna di şaristanan de hetgirê çeteyê DAIŞî bi zopa û çekan xoverodayişê şarî ra hêriş kenî û verba nê hêrişan zî şar hewna xoverodayişî xo ra fek veranêdono. Nika çeteyê DAIŞî taşeronîya hêzê kapîtalist kenî la ma aşkera vanê ke şarê kurd qet mergî ra nêtersenî û şarê ma azadîya ameyoxê xo ser mergî ra hadre yê.”
Amed destnîşan kerd ke verba no biryardarî zî dewleta faşîst û hetgirê a, verba şarê heme çekî şuxulnenê, hêzêke şarî ra vana çalakîyan biqedînê û no hêz wazena şarî teslîm bigero û şarê kurd aşkera vanê ke ma hetanê DAIŞ peynî nêkerî do ma têkoşîna xo ra fek veranêdê, şarê bi rayverê xo yew wucid bîyê û azadîyê Kobanê ser têkoşîn danê û hêzê kapîtalist bizanêke do her ca bibo Kobanê.”
XOVERODAYIŞÊ VAKURÎ
Amed destnîşan kerd ke şorişa Rojawan her ke şona şorişa Kurdistanî bena û nika Vakur seba şorişa Kurdistanî kûçeyan vila bîyo û şarê kurd seba şorişê ser hewanayo û xoverodayişê xo domneno û her ke şona xoverodayişê şarê vila benî û heme waran nika agêrayê warê şorişê û wina dewam kerd: “Dewleta tirk ma bi xo de temîyankena, çimkî dewleta tirk û DAIŞ di eynî zîhnîyetî de yê. Çeteyê DAIŞ, verê çimê heme dinyayê sareyê merdima birnenê û cenîyan ra tecawiz kenî. Yew het ra zî dewleta tirk dîrok ra nika şarê kurd ser wehşetî xo şuxulnena.”
Amed vatişê AKP ard vîr û arz ziwan ke vatişan nêşkenî polîtîkayê leyminîya AKP biqefelnê û wina vat: “Polêsê AKP zî zey çeteyê DAIŞî ser cenîyan tecawiz û tacîzî şuxulnenê. Di mîyanê hewteyê de polêsê AKP bi desan çalakwanî qetil kerd. Ma vatişê hukûmata ‘Seba ma DAIŞ û PKK eynî yo’ qet cidî nêgênî. Rayverê ma tesbîtîke raşt kerd û bi no vatişê xo ‘DAIŞ, JÎTEMê Rayverê Rojhîlatê Mîyanê yo’ maskeyê dewleta tirk ard ward. Projeya dewleta tirk û AKP deşîfre bi û dewleta tirk û AKP bi no projeyê xo wazenê serfirazîyê kurdan îmha bikerê û kurdan hewna bê nasname verabidê.”
HUDA-PARIJAN DAIŞGERÎ
Amed ciresna ke kam hêzêke, verba xoverodayişê kurdan astengî bikerê, heme nê hêzan verba têkoşîna kurdan ê û wina qedîna: “Tevgera ma hetanê nika her tim seba azadîyê şarê têkoşîn daya. Velev ke HUDA-PAR vana ke ma hetê dewleta tirk û AKP nîyê û no demî ganî bi pratîkê xo bimojnê. Ma qet nêwazenê rayvistişê kurdan reyde têkoşîn bidê. Ma heme hetgirê dewleta tirk a kurdan ra vanê ke ganî rayîrê şaşê ra biagêrê.”
Dîcle ARYA/JINHA/QENDÎL