Çewlîg de vizêr saetanê serê sibayî de polîsan eşt xeylê keye û awanîya Partîya Demokratîke ya Şaran ser. Netîceyê sereştişan de 9 kesê ke mîyanê înan de endamê Meclîsê HDPyî zî estbî, tepişîyayî. Ame musayene ke kesê ke ameyî tepiştene, neqlê Mudurîya Asayîşî ya Çewlîgî bîyî.
Polîsan sereştişî ra dima veng da hesabdarê HDPyî yê bajarê Çewlîgî Yaşar Yurtseverî û awanîya HDP sehna. Netîceyê sehnayîşan de dest nîya ser xeylê ewraq, afîş, pankart û sewbîna ser de. Babete ser o Hemserekê HDPyî yê Çewlîgî Veysel Kayayî reaksîyon nîşan da û wina va: “Demokrasî û zaf vengîyî ver Qesre eciz bîya. Binkewtişê AKPyî de rolê HDPyî gird bi, cok ra nika hewl danî heyfê ci HDP ra bigîrî.”
Heto bîn de polîsan Edene de zî eşt xeylê keyeyan ser û 6 kesî tepiştî. Kesê ke ameyî tepiştene, nê yî: Hemsereka Qezaya DBPyî ya qezaya Seyhanî Berîvan Gokalpe, xebatkarê HDPyî yê merkezê pêroyî Vedat Pekgenç, Endamê HDPyî Velî Uzun û hunermend Mecît Ozlu, Bahar Bozkurte û keso ke nameyê ci nêame musayene. Ame musayene ke kesê ke tepişîyayî badê ke kontrolê weşîye ra derbaz bîyî, neqlê Mudurîya Asayîşî ya Edene bîyî.
AMED