Nî qoman kurdî guretê binê bandira xo, cirê her çiyo xiravin heq vînenê.
Qeyta jû waxt nêwast kurdan de bi hevaliye, serbest û têdustiye biciwiyê. Na demê ma de hona zî birayenî û rindiye nêwazenê.
Çiqas ke kurdî seweta birayiye û haştiye cerayî vero, nî qomî honde bî zalimî. Zorê xo sono kurdan, zovîna pê kesê bînî nêşîkînê.
Piya ciwiyayîs herkeşî ra qirvan wazeno, jû het ra nê. La hata nika teyna kurdan seweta piya ciwiyayîs na qirvan û bedel da. Tirk, ereb, faris her tim seweta birayenî qirvan dayena ra dûr vinetî.
Nî hîre qomî, eke dismenê jûvîn be zî, verva kurdan piya gureyenê. Hîre qomî hetê dîn ra misliman yê. Kurd zî misliman yê. Hama hîremena zî zalimê kurdan ê, kurdan rê neqiye kenê.
Ziwano ke heq do kurdan cirê jede vînenê, herdo ke heq do kurdan dest ra gureto kerdo binê bandira xo, însanê kurd rê her ejat kenê, kisenê, tertele kenê.
Ez van, belka taye qarînê. La teyna hukumatî nêşîkînê bi serran honde zulum bikerê. Qom ke poşt ci nêdo, qeyta jû hukumat besenêkeno zulm û zorvajiya xo honde derg biramo. Hona teze, hukumatê tirkî Roboskî de 34 domonê kurdî qirkerdî, sarê tirkî kolonan û kuçan de serra neyiye kerde bimbarek.
Suriye de qeyta jû heqa kurdan çîna, hata ewro qomê erebî ra pize nêvejiya.
Îranî 1979 de soz da kurdan, dima tertele kerdî, qomê Îranî hukumatê xora nêvat, “ma kurdan rê ça zulum keme?”
Saddam Huseyîn çond reye fermanê kurdan vet, bi se hezaran qirkerdî, qomê erebî yê Îraq ra vengê nêvejiya. Nika ma têlewederîme, hama mavênê ma de haştiye çîna. Her roz ceng o, merden a, gonî sona.
Na gonî gune endî meherekiyo!
Raya naye zî rabiriyayena kurdan ra vêrena ra. Çike nî dewletî û qomê xo birayenî nêwazenê.
Cerabîme, belka o waxt jê cîranan, her kes herdê xo sero bi haştiye weşiya xo rameno. O waxt hebena rind beno.
Nika hen osenoke waxtê cerebiyayene endî amo. Nî rozan de onca herdê Kurdîstanî sero herbî raminê. Seweta kurdan nî qoman ra xatir wastene, no hal jû firsed o. Ma ke cerabîme, belka o waxt ma beme dost.

***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.