Verê cû amebî vatiş ke polîtîkayê leşkerî ke 24ê temuze ra dima hetê hukmatî ra amebî meşnayîş ra dima do ‘Merkezê Cazîbe’ bêrî awankerdiş. Na çarçewa de Serekwezîr Bînalî Yildirimî zî 24ê çileyî de Şinaseyê Destpêke ya Programê Merkezê Cazîbe aşkere kerd. 37 serrî verê eynî roje de derbeya leşkerî ya 12ê elûle ra ver ‘programê îstîkrarî’ amebî aşkerekerdiş. Bi nê programî heme qezencê karkeran amebî xespkerdiş. Prof. Dr. Ekonomîst Hayrî Kozanogluyî ‘programê îstîkrarî’ û ‘merkezê cazîbe’ da têver û vînayîşê xo ard ziwan.Prof. Dr. Kozanogluyî dîyar kerd ke bingeyê na hemle de tena înşaat est o û lazimîyê merdimanê herême rê çîyêk nêano. Kozanogluyî va referandûmî ra ver vistişê dewre yê na hemle, yeno manaya ke hukmat wazeno xo çimê şarî de şîrin binawno.
Ver bi felaketî şina
Kozanogluyî dewamê qiseykerdişê xo de va ‘programê îstîkrarî’ yê 1980î, programo ke hetê ÎMF, Bankaya Dinya û sewbîna dezgehê fînansî yê mîyanneteweyî ra ameyêne destekkerdiş û hedefê ci de vilakerdişê rêxistinanê sendîkayan estbî’ û qiseykerdişê xo wina domna: “Nika şîyayîşê hukmatî hetê sermaye de ver bi felaketî de yo, seba sermaye çareserî nêano. Nimûneya ci ya tewr baş hetê turîzmî de ya. Sera 35-40 kêmîbîyayîşê ameyeyê turîzmî bî sebeb ke sermayeya xerîbe nêro welat û sîstem no ser ro kewto tengasî. Eke no referandûm de şar hem Sîstemê Serekî û hem zî na polîtîkaya ekonomîke ra nêvajî nê, çareserîyêk nîno dîyayîş. Goreyê mi o wext welat do ver bi felaketî bikirancîyo.”
Netîce nêgeno
Kozanogluyî dewamê qiseykerdişê xo de programo ke sey dewamê ‘îstîkrarê ekonomîkî’ yeno dîyayîş û hewl dano ke cîyayî orte ra wedarno zî rexne kerd’ û wina dewam kerd: “Her kes wazeno ke şarê herême mîyanê keyeyê xo de bi hawayo biewle bişînbo debara xo bikero û bireso firsendanê perwerde, kar û weşî. Labelê heta ke prosesêko aştî nêro awankerdiş, hemleyê ke bêrî kerdiş zî ti netîce nêgenî. Merdimî seba ke bişînbî vernîya xo biveynî, ganî ewleyî bêro girewtiş û çîyê ke dîyar nîyî zî ganî bêrî dîyarkerdiş. Wexto ke nê ameyî kerdiş ra dima ancax o wext hemleyê ekonomîkî eşkenî bêrî kerdiş. Nika şert û mercê nêyî hetê polîtîk û ewleyî de nêameyî awankerdiş, cok ra şert û mercê OHALî de bi zorî kerdişê sermayegozarî netîce nêgeno. Heto bîn ra prosesêko winasî de hukmatê sermayegozarîyêk bi 19 mîlyar û 600 lîreyî senî virazeno?”
NECLA DEMÎR / DÎHABER / STENBOL