Endamê Akadamîya Îlmê Komelkî ya Abdullah Ocalanî Ozgur Denîzî derheqê babetanê vengdayîşê KCKyî yê seba yewîya neteweyî, zîyaretê Bînalî Yildirimî yê Îraq û Başûrê Kurdistanî, estena PKKyî ya Şengal de û averşîyayîşê ke Vakurê Kurdistanî de benî de qisey kerd.

Denîzî va ‘zîyaretê Bînalî Yildirimî yê Başûrê Kurdistanî vengdayîşê KCKyî yê seba yewîye ra dima bî û hedefê ci zî xirakerdişê atmosfero ke amebî awankerdiş bî’ û qiseykerdişê xo wina domna: “Merdim eşkeno vajo çend hedefê nê zîyaretî estbî; hedefo yewin, seba ke atmosferêko vengdayîşê KCKyî ra dima virazîya, xira bikerî bî. Yê dîyin zî semedo ke rijîyayîşêko Tirkîya hem herême de û hem zî hetê mîyanneteweyî de cuyena ver, wazena welatanê herême reyde têkilîyan rona. Reyna hedefanê nê zîyaretî ra yewe zî problemê estena qerargehê Tirkîya ke Başîka de yo û hem seba piştîdayîşê çeteyan û hem zî seba dagîrkerî kar keno yo. Her çiqas ke Serekwezîrê tirk Yildirim û çapemenîya tirkan nê zîyaretî bi hawayo baş nîşan bidî, yeno dîyayîş ke bi hawayo ke yeno nîşandayîş derbaz nêbîyo.” 

Do nêro vîrîkerdiş

Denîzî qiseykerdişê xo de qala Sûr de girdbîyayîşê hemkarîye kerd û wina dewam kerd: “Ez sifteyîn embazê ke Sûr de bi hawayo qehremanî xover dayî, silam kena. Nika Sûr de propagandayêk yeno kerdiş, no zî dizdêya qatilan a. Zîhnîyeto ke qetlîyam viraşt, nika zî wazeno nê xoverdayîşî defin bikero. Hedef tena viraştişê awanîyan nîyo, wazenî bi temamî bibedilnî. Nika zî hemkaran reyde wazenî gonîya ciwanan ser de rant bigirî. Wa bêro zanayîş ke no qet nîno vîrîkerdiş. Ganî şarê kurd vera nêyî de bivindero. Ewja de girdbîyayîşê hemkaran do nêro vîrîkerdiş. Ti hêzê sîyasî û dewlete nêeşkenî vera waştişanê şarî de bivinderî. Ganî her kes vera nêyî de reaksîyonê xo nîşan bidero.”

Do bi ekonomî şêro

Denîzî krîzê ekonomî ser o va ‘ekonomî polîtîkayan reyde eleqeder o’ û wina domna: “Eke hete sîyasî de bêîstîkrarî bibo, şima nêeşkenî ewja de ekonomî duştêko baş de bitepişî. AKP bi polîtîkayanê neolîberalan ame îqtîdar. Ekonomîya AKPyî girêdayeyê sermayeya teberî ya. Çimeyê pereyo ke keweno Tirkîya, dîyar nîyo. Xora nika yew qanûn ameyo vetiş, goreyê qanûnî bi her hawayî pereyo bêusûlî eşkîyeno bikewo Tirkîya. AKP bi polîtîkayanê ekonomîk ame îqtîdar û do bi ekonomî zî şêro. Çapemenîya îqtîdarî çiqas niminena wa binimina, do wina bibo. Rayber Apo wextê pêvînayîşan de tim na babete de hişyar kerdêne. Têkşîyayîşê AKP nizdî yo.”

AKPyî hemînan rot

Denîzî qiseykerdişê xo de dîyar kerd ke ‘sîyaseto ke AKP taqîp keno, sîyasetêko dirî yo’ û wina qedêna: “Nika Rûsya reyde pêvînayîşî yenî kerdiş, labelê verê cû tersê ci ameyêne kerdiş. Verê cû Tirkîya Sûrîye de piştî da çeteyan. Yê ke DAIŞî miqate kerd û vera kurdan de da şerkerdiş AKP bî. Tirkîya waşt Rûsya û NATO bîyaro duştê yewbînan û sîyasetêko winasî meşna. Teyaraya Rûsya da waro û îzehetê wişkî ameyî kerdiş. Yê ke îdîa kerdêne ke do Heleb de nimaj bikerî, nika tersê ci de hereket kenî. Hêzê ke Tirkîya piştî dayêne înan, hemînan masa ser de rot. Tirkîya seba bekaya xo eşkena heme çîyan bikera. Tirkîya raştîya xo de Rojhelato Mîyanên de vînî kena.”


BAZ SÎPAN / MEM LEZGÎN / ANF / BEHDÎNAN