Hemseroka newe yê HDP Serpîl Kemalbay, aşkere kerd ke xeynê HDP omidekê Tirkîye nêmendo û dîyar kerd ke, ê eşkenê tifaqê demokratîke virazê.
Peynîya hefte Kongreyê HDP virazîya. Bi sebebo ke parlamenterîya Hemseroka Pêroyî yê HDP Fîgen Yuksekdag ame betalkerdiş, Kongre de Serpîl Kemalbay seba Hemserokîya newe yê HDP amê weçîntayîş. Kemalbay mîyanê Platformê Piştîgirewtişê Sosyalîst (SODAP) de ca gêna, no wextê ko tewrê têkoşîna emegî bîya. Weçîntayîşanê 7'ê Hezîran de Herêma 1. ê Stenbol de namzeta parlamenterî bî. Kemalbay, Kongre yê HDP ra dima, ser babedê ke rojdem de yê de qisey kerd.
Serpîl Kemalbay vist vîrî ke, ê dê ser 'Plana Raya Têkoşîna Haştî û Demokrasî’ ke Selahattîn Demîrtaş ser şixulyeno, vinderê û va, ‘Hedefê înan o sereke yê Kongre ronayîşê siyaseta seba çareserîya meseleya Kurd o. Kemalbay hayr ant hêrîşanê vera HDP ser û da zonayen ke 5 hezar embazê înan yê ke keyeyan de gureyenê amey girewtiş. Kemalbay dîyar kerd ke no yew xespkerdişê heqê şaran o.
‘Derbeya sivîl ser kar a’
Serpîl Kemalbay vist vîrî ke, bi sebebo ke nêşkenê vernîya têkoşîna şarî bigîrê, hemserok, parlamenter, hemşaredar û rayveber amey girewtiş û wina dewam kerd: “Seba ke referandûmî de serbikewê, dewlet verîya referandûmî hemserokê ma û bi hezaran endamê ma girotî. Nayî ra pîya, 16'ê Nîsane de vêşêrê nîmeyê şaranê Tirkîye va ‘Nê’ û tewrê xo seba demokrasî nîşan day. Rewşê nikayî de darbeya sivîl yena ramiten. Ma êşkenê zey nameyê derbeya sivîl bi name bikerê.”
‘Xeynê HDP omid nêmendo’
Kemalbay hayr ant meseleya Kurd ke Tirkîye de açarnîya kangren û wina dewam kerd: “Ma hewl danê manîfestoyeke newe yê demokrasî hadre bikerê. Seba formulê cuya ortex û çareserîya demokratîk newe de ra ronê û xerîtayeke rayî virazê, no manîfesto yeno hadrekerdiş. Xeynê demokrasî û haştî ti rayekê bîn yê xelesnayîşî çin a. Nayî ra xeynê HDP ti omid Tirkîye de nêmendo.”
Kemalbay destnîşan kerd, karekê ko muhîm ke kongre ra dima day vernîya xo, rêxistinîya xort a û wina va: “Ma wazenê asta rêxistinîya xo di qatî vêşêr bikerê û ameyoxeke rind bidê şaranê Tirkîye. Ma eno bawerî de yê ke bi tifaqê demokratîk eşkenê nayî bikerê."
‘Ma wazenê cinîyan mîyanê xo de bivînê’
Kemalbay veng da cinîyan, ke bi rengekê xoser, mîyanê HDP de xo rêxistin bikerê û aşkere kerd ke, HDP têkoşîna cinî de gameke muhîm eşt. Kemalbay vist vîrî ke, kesê ke seba înan ame vaten ’nêşkenê tewrê sîyasetî bibê’ mîyanê HDP de siyaset kenê û wina dewam kerd: “Na rewş zî serdestan qehrnena. Seba cinîyan mîyanê sîyasetî de bi krîterê têdûşte ca girewtiş, seba cinîyan raya hişyarbîyayîşeke pîlî akerd. Cinî kişta tewr xoverder ê têkoşînî de ca gênê. Nayî ra serdestî û camêrdî tim hêrişê cinîyan kenê.”
Kemalbay tewr peynî de aşkere kerd ke ê dê dûştê bloka serdestî ke nêwazena paradîgmaya azadîparêzîya cinî xurt bibo, ma dê xo hona rind rêxistin bikerê û kuçeyan açarnê cayê xoverdayîşî û va ‘Dûştê kerdenê faşîst ke wazena cinî tenya keye de bê, ma wazenê cinîyan qadê azad û mîyanê xo de bivînê.”
ANF/ANQARA