Quwetanê Lejkerî yê Dewleta tirk bi destegê çeteyanê Ceyş El Fetîh (ke bi El Nusra û Ahrar El Şam ra pîyakarî kenê û xêlê cayanê zey Heleb, Îdlîb-Lazkîye de qetlîaman viraştî) vizêr seatanê şodirî ra tepya destpa herekatê îşgalkerdişê Cerablûsî kerd. Artêşa tirk seatanê vera şodirî ra, bi topan destpa êrişan kerd. Bado zî tanqanê tirk heveyê cayan ra sînor ravêrdî. Netîceyê êrişanê hewayîn de, tewr kêmî 29 sivîlan weşiyê xo kerd vinî. Bi hezaran welatijê sivîl ê Cerablus zî, herekatê îşgalkerdişî ser, verê xo day hetê Minbic ke verîya wextekê çeteyanê DAIŞ ra amê xelesnayen.
‘Tirkîye do çalî ra nêvejyo’
Rayveranê tirk sernî de îdîa kerdî ke, hedefê înan Cerablûs ra eştişê DAIŞ o. La belê peycoy zî sernî de Serokkomarê tirk Tayîp Erdogan û Wezîrê Karê Teverî, aşkere kerd ke, hedefê înan ê esasî destkewtişê kurdan ê. Erdogan û rayveranê bîn ê tirk, Rojawa tehdît kerdî û fina bîn dişmenînê xo yê vera kurdan damûsnay.
Hemserokê PYD Salih Muslimî vera herekatê îşgalkerdişî yê dewleta tirk ê Cerablûsî nêrazîbîyayişanê xo ard ziwan. Muslimî aşkere kerd ke Tirkîye tewrê lejê Surîye biyo û wina va: “Tirkîye bi destanê xo tewrê no herbî bî, la vejyayişê ci do bi destanê xo nêbo. Tirkîye do ewja de çalî ra nêvejyo.
Serokwekîlê Koma HDP Îdrîs Balûkenî zî vist vîrî ke dişmenîya verra kurdan Tirkîye kirêşt çala herbî. Balûkenî vist vîrî ke herekatê îşgalkerdişî dûştê DAIŞ nê, dûştê serkewtişanê şaranê Rojawa yo. Balûkenî vist vîrî ke El Nusra û Ahrar El Şam ke operasyonî de ca gênê bi zîhniyetê DAIŞ ra jewî yê û va Tirkîye hewl dana ke nê rêxistinanê çete zey ‘mûxalîfê nerm’ dinyayî rê bido qebûlkerdiş, la kes emelê nayî nêkeno.
ANHA/CERABLÛS